O‘zLiDeP’ning navbatdagi event-tadbiri G‘ijduvonda bo‘lib o‘tdi

Jamiyat 14:11 / 13.04.2023 8314

O‘zbekiston Liberal-demokratik partiyasining Konstitutsiyaviy qonun loyihasi bo‘yicha o‘tkaziladigan referendum targ‘ibotiga bag‘ishlangan navbatdagi event-tadbiri G‘ijduvon tuman hokimligining ochiq maydonida tashkil qilindi.

Targ‘ibot-tashviqot tadbirda O‘zLiDeP Siyosiy Kengashi Ijroiya qo‘mitasi raisi Aktam Xaitov, parlamet quyi palatasi va mahalliy kengash deputatlari, partiya faollari, tadbirkor va fermerlar, xotin-qizlar, yoshlar hamda OAV vakillari ishtirok etdi.

Tadbirda so‘z olgan partiya yetakchisi Yangi O‘zbekistonni barpo etishdek oliy maqsad sari qo‘yilgan qadamlar albatta Asosiy qonunni yangilash zarurligini taqozo etgani va yangi tahrirdagi hujjatda O‘zbekiston ijtimoiy davlat, degan g‘oya asosiy mezon qilib olinganini, Konstitutsiyani qayta ishlab chiqishda bevosita xalqning taklif, xohish-istaklari e’tiborga olingani, hujjat referendumga qo‘yish orqali qabul qilinishini aytib o‘tdi.

Yangilanayotgan Bosh qomusimizda milliy iqtisodiyot va tadbirkorlikni rivojlantirish, mamlakatda investitsiyaviy muhitni yaxshilash hamda mulk himoyasini yanada kuchaytirishga qaratilgan normalar kiritilmoqda. Bank omonatlari, balki bank operatsiyalari va hisob varaqlarning ham sir tutilishi kafolatlanmoqda. Soliq va yig‘imlar adolatli bo‘lishi va fuqarolarning konstitutsiyaviy huquqlarini amalga oshirishiga to‘sqinlik qilmasligi mustahkamlanmoqda.

Oliy Majlis Qonunchilik palatasi deputati Emma Aslonovaning fikricha, yangilanayotgan Konstitutsiyaga muvofiq davlat qulay investitsiyaviy va ishbilarmonlik muhitini ta’minlaydi. Mazkur norma investorlarning ishonchini oshirish, tadbirkorlar huquqlari va qonuniy manfaatlarini ishonchli himoya qilishni ta’minlashga xizmat qiladi.

– Tadbirkorlikni boshlaganimga ancha yillar bo‘ldi, – deydi tadbirkor, tuman kengashi deputati Zamira Safarova.  – Bor-yo‘g‘i 2-3 kishi bilan faoliyatimni boshlagan bo‘lsam, bugungi kunda 45 nafar ishchi-xodimim bilan “G‘ijduvon mashhurasi” xususiy korxonasiga rahbarlik qilyapman. Asosan qurilish-pardozlash materiallari ishlab chiqarishga ixtisoslashgan tadbirkorlik sub’yektimiz faoliyati natijasida dunyodagi bir qator – Turkiya, Qirg‘iziston, Isroil, Niderlandiya singari davlatlarga eksport mahsulotlarini yuboryapmiz. Erishayotgan yutuqlarimizning barchasi yurtimizda soha xodimlari uchun yaratib berilgan imkoniyatlar sharofatidandir. Men oila a’zolarim va mehnat jamoam bilan birga referendumda ishtirok etaman. Vatanimiz ravnaqi, elimiz tinchligi va osoyishtaligi, xalqimiz farovonligi kafolati bo‘lgan yangi Konstitutsiyani yoqlab ovoz berishga barchani chaqirib qolaman.

Tadbirda Buxoro tumanidagi “Madaniyat Muhammad Ismat” fermer xo‘jaligi rahbari, O‘zbekiston Qahramoni, xalq deputatlari viloyat kengashi deputati Muhammad Ahmedov ham so‘zga chiqib, o‘zini to‘la oqlayotgan klaster tizimi yurtimiz agrar sohasida ham pirovard natija berayotganini, bu ayniqsa paxta to‘qimachilik klasterlari faoliyatida aniq ko‘zga tashlanayotganligini aytib o‘tdi.

O‘zLiDeP Buxoro viloyati Kengashi
Matbuot xizmati

Ko‘proq yangiliklar: