Европа Иттифоқи The Wall Street Journal (WSJ) журналисти Эван Гершковичнинг Россияда қўлга олинишини қоралади. Бу баёнотни 30 март, пайшанба куни кечқурун Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел Twitter'да эълон қилди.

«Журналистларга ўз касби билан эркин шуғулланишига имкон бериш керак, улар ҳимояга лойиқ», — дея қўшимча қилди у. Европа дипломатияси раҳбарининг сўзларига кўра, Эван Гершкович ишида «Россия расмийлари яна бир бор оммавий ахборот воситалари эркинлигига тизимли равишда ҳурматсизлик кўрсатган».

WSJ мухбирининг Екатеринбургда қўлга олингани 30 март куни маълум бўлди. Ўша куни кечқурун Эван Гершкович «жосуслик» иши бўйича Москванинг Лефортово суди қарори билан 29 майгача ҳибсга олинган. Гершкович совуқ уруш тугаганидан кейин Россияда жосусликда айбланиб, ҳибсга олинган биринчи хорижлик мухбир бўлди.

Федерал хавфсизлик хизмати («ФСБ») мухбир «Россия ҳарбий-саноат комплекси корхоналаридан бирининг фаолияти тўғрисида давлат сирини ташкил этувчи маълумотларни тўплагани»ни даъво қилган. Россия Жиноят кодексининг «жосуслик» моддаси 10 йилдан 20 йилгача озодликдан маҳрум қилиш тарзидаги жазони назарда тутади.

Журналист Екатеринбургга «Вагнер» ХҲК ҳақида мақола ёзиш учун келган. 

«Аниқланишича, Эван Гершкович Америка томонининг кўрсатмаси бўйича Россия ҳарбий-саноат комплекси корхоналаридан бирининг фаолиятига оид давлат сирини ташкил этувчи маълумотларни тўплаган. Махфий маълумотларни олишга уринаётганда, чет эллик фуқаро Екатеринбургда қўлга олинди», — дея «ФСБ» Жамоатчилик билан алоқалар маркази хабаридан иқтибос келтирган Россиянинг ТАСС.