«ФСБ» маълумотларига кўра, The Wall Street Journal журналисти Эван Гершкович Россияда ҳарбий-саноат мажмуаси корхоналаридан бирининг фаолиятига оид давлат сири тоифасига кирувчи маълумотларни тўплаган.

Американинг The Wall Street Journal нашри мухбири Эван Гершковичга қарши Россия «ФСБ» жосуслик бўйича иш қўзғатди. Бу ҳақда 30 март, пайшанба куни рус тилидаги ОАВ ва Telegram-каналлар хабар беряпти.

Қайд этилишича, журналист Екатеринбургда қўлга олинган, у ушбу шаҳарга «Вагнер» ХҲК ҳақида мақола ёзиш учун келган. 

«Аниқланишича, Эван Гершкович Америка томонининг кўрсатмаси бўйича Россия ҳарбий-саноат комплекси корхоналаридан бирининг фаолиятига оид давлат сирини ташкил этувчи маълумотларни тўплаган. Махфий маълумотларни олишга уринаётганда, чет эллик фуқаро Екатеринбургда қўлга олинди», — дея «ФСБ» Жамоатчилик билан алоқалар маркази хабаридан иқтибос келтирган Россиянинг ТАСС ахборот агентлиги. 

DW’нинг The Wall Street Journal таҳририятига вазият ҳақида изоҳ бериш сўрови бўйича хабар эълон қилинган вақтга қадар ҳеч қандай жавоб олинмаган.