Prezident Qoraqalpog‘iston aholisi uchun manfaatli bo‘lgan 3 ta yangi tashabbusni sanadi

O‘zbekiston 13:22 / 30.03.2023 11573

Shavkat Mirziyoyev qoraqalpog‘istonliklar bilan bo‘lib o‘tgan yig‘ilishda respublika mahallalarini obod qilish, suv, yo‘l, elektr ta’minotini yaxshilash, maktab, bog‘cha va tibbiyot punktlarini qurish va ta’mirlash bo‘yicha aniq raqamlarga to‘xtaldi. Prezident aholi farovonligini yanada oshirishga qaratilgan yangi uch tashabbusni sanadi, deya xabar bermoqda Kun.uz muxbiri. 

Yig‘ilishda ta’kidlanishicha, Qoraqalpog‘istonda ijtimoiy masalalarni hal qilish uchun 2023 yilda 1,5 trillion so‘m berilyapti. Bundan tashqari 452 ta mahalladagi sharoiti og‘ir 21 mingta xonadon ta’mirlanadi, 709 ta uylar yangitdan qurib beriladi. Bunga budjetdan 132 milliard so‘m, Toshkent shahri va viloyatlardan 232 milliard so‘m ajratiladi.

Yangi uch tashabbus

1.  Qoraqalpog‘istondagi 452 ta mahallaning har biriga to‘g‘ridan to‘g‘ri 500 million so‘mdan qo‘shimcha mablag‘ ajratiladi. Buning uchun alohida Qoraqalpog‘iston mahallalarini qo‘llab-quvvatlash jamg‘armasi tashkil qilinib, unga joriy yilda 250 milliard so‘m ajratiladi.

“Muammoni mahallaning o‘zi ko‘tarsin, o‘ziga pul beraylik, o‘zi nazorat qilsin. Shunda sifat va manfaat bo‘ladi. Odamlar rozi bo‘ladi. Navro‘z bayrami va “Mahalla kuni” arafasida mahalla raislari, imomlarni rag‘batlantirdik. Qoraqalpog‘istonda azal-azaldan o‘ziga xos tizim – “ko‘cha-biy”lar bor. Odamlarimizning hayotini yaxshilashga hissa qo‘shayotgan bunday jonkuyar insonlar mehnatini ham munosib rag‘batlantirish kerak, deb o‘ylayman”, dedi Shavkat Mirziyoyev.

2.  Qoraqalpog‘istonda 47 ming uy-joy va ko‘chmas mulklarning kadastri yo‘q. Bu aholini ipoteka olish, tomorqasida dehqonchilikka kredit, subsidiya olish, yashayotgan boshpanasini farzandlariga meros qoldirish imkoniyatini cheklayapti. Shu sababli ikki oyda 38 ming qoraqalpog‘istonliklarning uy-joy kadastri to‘liq qilib beriladi.
 
3. Qoraqalpog‘istonda har yili 6,5-7 mingta uy-joyga talab bor. Shu bois 2023 yil o‘tgan yilga nisbatan 2 baravar ko‘p yoki 4 mingta uy-joy quriladi. 

“Bunga qo‘shimcha qilib, faqat Qoraqalpog‘iston aholisi uchun yangi imkoniyat yaratamiz. Ya’ni, zamonaviy loyiha asosida 4 ming yakka tartibdagi uy-joy qurishga 4 sotixdan yer ajratiladi. Infratuzilmasini ham qilib beramiz. Bunday imkoniyatni boshqa hududlarimizga bermaganmiz”, dedi Shavkat Mirziyoyev.

Mas’ullarga shu yilning 1 mayigacha kamida 2 mingta, 1 sentabrgacha yana 2 mingta yer uchastkasini joyini belgilab, aholiga ajratish vazifasi yuklandi.

Ko‘proq yangiliklar: