AQSh prezidenti Jo Bayden butun dunyoda demokratiyani mustahkamlash uchun 690 million dollar (637 million yevro) ajratishga va’da berdi. Bu mablag‘lar samarali va shaffof boshqaruv, matbuot erkinligi, korrupsiyaga qarshi kurash, erkin saylovlar va demokratiyani targ‘ib qiluvchi texnologiyalarga yo‘naltirilishi kerak, dedi Amerika yetakchisi 29 mart, chorshanba kuni AQSh tomonidan tashkil etilgan ikkinchi xalqaro «Demokratiya sammiti»da.

Asosan videokonferensiya orqali o‘tayotgan uchrashuv ishtirokchilariga murojaat qilib, Bayden demokratiyani mustahkamlash «zamonimizning eng muhim muammosi» ekanligini aytdi. Shu bilan birga, u Rossiyaning Ukrainaga qarshi urushi va AQShning Xitoy bilan munosabatlaridagi keskinlikka qaramay, o‘tgan yil davomida ijobiy siljishlarni qayd etdi. «Bugun biz g‘urur bilan aytishimiz mumkinki, jahon demokratiyalari kuchsiz emas, kuchayib bormoqda. Dunyodagi avtokratiyalar kuchayib emas, zaiflashib boryapti. Bu barchamizning bevosita mehnatimiz natijasidir», - dedi Bayden.

Germaniya kansleri Olaf Shols bu yilgi yig‘ilishda Rossiya Ukrainaga qarshi urush boshlaganidan so‘ng, ichkaridan va tashqaridan tahdidlarga qarshi demokratiyalarning chidamliligini oshirish yanada dolzarb bo‘lib qolganini aytdi. «Rossiya rahbariyati demokratik qo‘shnisida xavfni ko‘rmoqda, chunki Ukraina muvaffaqiyatli davlat bo‘lsa, Putin o‘z fuqarolariga nima uchun ular bir xil erkinlik va farovonlikdan foydalana olmasligini tushuntirishi kerak bo‘ladi», — dedi Germaniya hukumati rahbari.

Ukraina prezidenti Volodimir Zelenskiy «Demokratiya sammiti» ishtirokchilarini Kiyevga qurol yetkazib berishga chaqirdi. «Yong‘in sodir bo‘lganda, o‘t o‘chiruvchilar o‘t o‘chirish mashinalari berilishini bir necha oy kuta olmaydi yoki o‘t o‘chirish moslamalari qisqa masofada ishlashi kerakligiga rozi bo‘la olmaydi. Bu urushda ham shunday. O‘zini himoya qilganlarga qancha cheklovlar qo‘yilsa, yo‘qotish va vayronagarchiliklar shuncha ko‘payadi, chunki tajovuz alangasi chegara bilmaydi. Shuning uchun demokratiya himoyasi tajovuzkorning mag‘lubiyatini ishonchli kafolatlaydigan barcha qurollarga ega bo‘lishi kerak», — dedi Zelenskiy o‘z videomurojaatida.