Yevropa Ittifoqi davlatlari Yevrokomissiyadan Moldovaga yozgacha qo‘llab-quvvatlash paketini taqdim etishni so‘radi, dedi 28 mart, seshanba kuni Kishinyovga rasmiy tashrifi chog‘ida YeI kengashi rahbari Sharl Mishel. U makromoliyaviy yordam paketi «katta va salmoqli» bo‘lishini va’da qildi.

Bundan tashqari, Mishel YeI Kengashi 2023 yil oxirigacha Ukraina va Moldova bilan Yevropa Ittifoqiga qo‘shilish muzokaralarini boshlash bo‘yicha qaror qabul qilishi kerakligini aytdi. «Bu Yevropa Komissiyasi tayyorlaydigan hisobotni inobatga olgan holda siyosiy qaror bo‘ladi va yil oxirigacha ijobiy qaror qabul qilinishiga chin dildan umid qilaman», — dedi u. YeIga kirish yo‘lidagi taraqqiyot Moldova xalqi uchun «aniq va ijobiy natijalar» beradi, deb ishontirdi YeI Kengashi prezidenti.

U, shuningdek, Yevropa Ittifoqining Moldova xalqi bilan birdamligini ta’kidladi va 2022 yilda Bryussel Moldova barqarorligini, ayniqsa energetika sohasida qo‘llab-quvvatlash uchun bir milliard yevrodan ortiq mablag‘ni safarbar qilganini eslatdi. «Biz ko‘proq narsani qilishga tayyormiz», deb qo‘shimcha qildi Mishel.

«Siz borgan sari ko‘proq dushman rus razvedkasi nishoniga aylanyapsiz. So‘nggi oylarda Rossiya va uning ishonchli vakillari energiya, kiberhujumlar, norozilik namoyishlari va boshqa qo‘poruvchilik harakatlari yordamida mamlakatingizni beqarorlashtirishga ko‘proq urinmoqda. Biz mamlakatingizni beqarorlashtirishga qaratilgan bu urinishlarni keskin qoralaymiz», dedi Yevroittifoq Kengashi rahbari.