To‘qayev Turkiy investitsiya fondi tashkil etilishini ma’qulladi

Turkiy investitsiya fondi Qozog‘iston, Ozarboyjon, Qirg‘iziston, Turkiya va O‘zbekiston ishtirokida shakllantiriladi. U Turkiy davlatlar tashkilotiga a’zo davlatlarning iqtisodiy rivojlanishiga yordam beradi.

Qozog‘iston prezidenti Qosim-Jo‘mart To‘qayev Turkiy investitsiya fondini tashkil etish to‘g‘risidagi bitim loyihasini imzoladi. Bu haqda 28 mart, seshanba kuni Zakon.kz portali xabar berdi. 

Fond Qozog‘iston, Ozarboyjon, Qirg‘iziston, Turkiya va O‘zbekiston ishtirokida shakllantiriladi. Uni tashkil etish to‘g‘risidagi qaror 2021 yil 12 noyabrda Istanbulda qabul qilingan. 

Tashabbus Turkiy davlatlar tashkiloti (TDT) a’zolarining iqtisodiy rivojlanishiga ko‘maklashish maqsadida ishlab chiqilgan. 

Fondning kapitali TDT har bir a’zosi uchun 2000 tadan 10 000 tagacha boshlang‘ich aksiyani tashkil qiladi. Har bir davlat uchun to‘lanadigan aksiyalarning narxi 70 million dollar (64,73 million yevro)ga teng bo‘ladi.

Tashkilot rahbari boshqaruv kengashi tomonidan rotatsiya asosida to‘rt yil muddatga tayinlanadi. Qayta tayinlash bundan mustasno. Fond rahbari o‘z faoliyatini faqat boshqaruv kengashi qarori bilan tugatishi mumkin. 

Fondning birinchi rahbari TDT davlat rahbarlari kengashi tomonidan to‘rt yilga tasdiqlanadi. 

Tashabbus mintaqalararo savdoni rivojlantirishga ko‘maklashish, transport-logistika zanjirlarini qo‘llab-quvvatlash, «yashil iqtisodiyot» loyihalarini moliyalashtirish maqsadida ishlab chiqilgan. 

Farmon imzolangan paytdan e’tiboran kuchga kiradi. 

Qozog‘iston prezidenti Qosim-Jo‘mart To‘qayev 2022 yil boshida hukumatga qarshi ommaviy namoyishlar va tartibsizliklar ortidan modernizatsiya jarayonini boshladi. 

Rossiya Ukrainaga keng ko‘lamli harbiy bosqin boshlanganidan keyin bir necha bor Qozog‘iston neftining Novorossiysk terminali orqali Yevropa Ittifoqiga eksportini to‘sib qo‘ygan.