Germaniya Ukrainaga moliyaviy va harbiy yordamni sezilarli darajada oshirishi mumkin — hozirgi uch mlrd yevrodan 15 milliard yevrogacha, deb yozadi Der Spiegel haftalik nashri Germaniya Moliya vazirligining 27 mart, dushanba kuni Bundestagga yo‘llagan maxfiy xatiga tayanib.

Nashr ma’lumotlariga ko‘ra, Germaniya moliya vazirining parlament davlat kotibi Florian Tonkar Bundestag budjet qo‘mitasiga elektron xat orqali Ukrainaga yordam ko‘rsatish uchun mablag‘ ajratiladigan budjet moddalarini moliyalashtirishni ko‘paytirish so‘rovini shakllantirgan. Hujjatga ko‘ra, joriy yilda «xavfsizlik, mudofaa va barqarorlikni ta’minlash sohasida hamkor davlatlarni modernizatsiya qilish» uchun rejalashtirilgan 2,2 milliard yevro miqdorini 5,4 milliard yevroga oshirish kerak.

Bundan tashqari, Der Spiegel ma’lumotlariga ko‘ra, yaqin yillarda yana 8,8 milliard yevro «majburiyatlar uchun ajratmalar»ga yo‘naltirilishi kerak. Shunday qilib, Germaniya Mudofaa vazirligi ushbu miqdor doirasida shartnomalar tuzishi mumkin bo‘ladi. Ayni damda Germaniya budjetida ushbu xarajatlar moddasi uchun 1 milliard yevro ko‘zda tutilgan, deb yozadi nashr.

Der Spiegel nashri Tonkarning maxfiy maktubidan qo‘shimcha mablag‘lar zarurligini asoslovchi ko‘chirmalarni keltirib o‘tdi: «Ukraina qurolli kuchlarining moddiy yo‘qotishlari ko‘p bo‘lgani sababli, yangi materiallar zaxiralari zarur». «Ukraina qurolli kuchlarini ularning ehtiyojlariga mos ravishda barqaror jihozlash uchun zudlik bilan ko‘plab xarid shartnomalarini tuzish kerak, bu esa kelgusi budjet yillari uchun to‘lov majburiyatlarini ham oqlaydi», deyiladi hujjatda.