BMT Xavfsizlik kengashi Rossiyaning «Shimoliy oqim» bo‘yicha rezolyutsiyasini rad etdi

Jahon 08:37 / 28.03.2023 5464

BMT Xavfsizlik kengashi Rossiyaning «Shimoliy oqim» va «Shimoliy oqim 2» gaz quvurlarida portlashlarni tashkil etish yuzasidan xalqaro tergov o‘tkazish to‘g‘risidagi rezolyutsiyasini qo‘llab-quvvatlamadi. 27 mart, dushanba kuni bo‘lib o‘tgan ovoz berishda ushbu hujjat faqat Rossiya, Xitoy va Braziliya tomonidan qo‘llab-quvvatlandi, Xavfsizlik kengashining qolgan 12 a’zosi esa betaraf qoldi.

Rezolyutsiya uchun kamida to‘qqizta «ha» ovozi hamda Rossiya, Xitoy, Fransiya, AQSh va Britaniya tomonidan veto qo‘yilmasligi kerak edi.

Rossiyaning «Shimoliy oqim»dagi portlashlarni tekshirish bo‘yicha BMT komissiyasini tuzish to‘g‘risidagi rezolyutsiyasi bo‘yicha ovoz berishda betaraf qolgan davlatlarning aksariyati buni davom etayotgan milliy tergov natijalarini kutish istagi bilan izohladi, deya ta’kidlaydi Reuters.

Xususan, AQShning BMTdagi vakili o‘rinbosari Robert Vudning aytishicha, «Shimoliy oqim» bo‘yicha BMT shafeligida tergov o‘tkazishga hojat yo‘q, chunki Shvetsiya, Daniya va Germaniyada tergovlar «har tomonlama, shaffof va xolis olib borilmoqda». U Rossiya rezolyutsiyasini «davom etayotgan milliy tergov ishlarini obro‘sizlantirish va ularning Rossiyaning oldindan belgilab qo‘yilgan va siyosiy pozitsiyasiga to‘g‘ri kelmaydigan xulosani qarama-qarshi qo‘yishga urinish» deb atadi. «Bu haqiqatni topishga urinish emas», dedi Vud.

So‘nggi oylarda Rossiya «Shimoliy oqim» portlashlari bo‘yicha milliy tekshiruv o‘tkazayotgan davlatlarni ular Moskvani vaziyat haqida xabardor qilmayotgani borasida bir necha bor qoraladi.

2022 yil 26 sentabrda «Shimoliy oqim»ning ikkita tarmog‘ida, keyin esa «Shimoliy oqim-2»da jami to‘rtta sizib chiqish joyi aniqlangan. Bungacha Shvetsiya va Daniyadagi seysmologik stansiyalar xuddi shu hududda kuchli suvosti portlashlarini qayd etgan.

Germaniya, Daniya va Shvetsiyada hodisa sabablarini aniqlash bo‘yicha tergov ishlari olib borilmoqda. Portlash sabablari haqida hali ishonchli ma’lumotlar yo‘q.

Ko‘proq yangiliklar: