Болгария вице-президенти Илияна Йотова Россия президенти Владимир Путиннинг Беларусда Россия ядро қуролини жойлаштириш ҳақидаги баёноти муносабати билан Россия ва Украина ўртасида музокаралар ўтказишга чақирди. Бу ҳақда 26 март, якшанба куни dpa агентлиги хабар берди.

Йотованинг сўзларига кўра, вазият «борган сари хавфли ва қўрқинчли» бўлиб бормоқда, шунинг учун у ва Болгария президенти Румен Радев бир неча бор музокара ўтказишга чақиришган. «Бу қуруқ сўзлар эмас», деб таъкидлади Йотова ва барча мамлакатларда қуролнинг кўплиги олдиндан айтиб бўлмайдиган қарорларга олиб келаётгани ҳамда амалда жиддий уруш хавфи борлигини қўшимча қилиб ўтди.

«Умид қиламанки, бу ақл-идрок ҳали ғалаба қозонади ва гап ҳақиқий ҳаракатлардан кўра кўпроқ таҳдидлар ҳақида боряпти», - дея қўшимча қилди Йотова.

Бир кун аввал Путин Россиянинг Беларусда тактик ядро қуролини жойлаштиришини айтган эди. Унинг сўзларига кўра, гап тактик ядро қуролини ташишга қодир 10 та самолёт ва «Искандар» ракета тизими ҳақида кетмоқда. Бундан ташқари, 2023 йил июль ойида Беларусда тактик ядровий қуролларни сақлаш омбори қурилиши якунланади, деди Путин. 

Унинг қўшимча қилишича, Россия Беларусга қурол бермаяпти, фақат уларни жойлаштирмоқда, демак, бу қадам ядро қуролини тарқатмаслик ҳақидаги келишувни бузмайди. Унинг сўзларига кўра, Россия АҚШ НАТО мамлакатларида «ўнлаб йиллар давомида қилган ишни амалга оширяпти» - тактик ядро қуролларини жойлаштирмоқда.