Bugun, 18 martdan, “Tashabbusli budjet” jarayonining joriy yildagi 1-mavsumi doirasida ovoz berish jarayoni boshlandi. Bu haqda Moliya va iqtisodiyot vazirligi matbuot xizmati xabar bermoqda.

Mavsum doirasida fuqarolar tomonidan ilgari suriladigan loyihalarni moliyalashtirish maqsadida respublika bo‘ylab 1,7 trillion so‘m mablag‘lar yo‘naltirilishi ko‘zda tutilgan.

“Hurmatli fuqaro! Ushbu jarayonlarda faol ishtirok etgan holda ijtimoiy muammolarning (jamoaviy xarakterdagi) hal etilishiga erishing. Budjet mablag‘larining sarflanishida ishtirok eting.

Bu juda ham oson, o‘z hududingizdagi mavjud muammolarni bartaraf etish yuzasidan loyihani ilgari suring, ovoz to‘plang va g‘olib bo‘ling!” deyiladi rasmiy xabarda.

Ma’lumot uchun, 1-mavsum doirasida fuqarolardan jami 55,9 mingta tashabbus kelib tushgan. Tashabbuslarning 26 foizi ichki yo‘llarni ta’mirlash, 18 foizi umumta’lim maktablarini ta’mirlash yoki jihozlash, 11 foizi esa ko‘cha chiroqlarini ta’mirlash va o‘rnatishga hamda elektr energiya ta’minoti bilan bog‘liq loyihalarga doir.