“Tashabbusli budjet”da g‘olib bo‘lgan loyihalarning ijrosini kim nazorat qiladi?

O‘zbekiston 13:53 / 17.03.2023 6717

16 mart kuni AOKAda Iqtisodiyot va moliya vazirligi mutasaddilari ishtirokida matbuot anjumani o‘tkazildi. Unda “Tashabbusli budjet” loyihasining amalga oshirilishi va  navbatdagi mavsum tahlili yuzasidan ma’lumot berildi.

Anjumanda Kun.uz muxbiri “Tashabbusli budjet”da g‘olib bo‘lgan loyihalarning ijrosi yuzasidan jamoatchilikda qator savollar borligini qayd etdi: “Masalan, ichki yo‘llarni ta’mirlashda asfaltlarning o‘ta sifatsizligi bo‘yicha. Ayni paytda Moliya va iqtisodiyot vazirligi ushbu jarayonlarni to‘liq nazorat qila oladimi va bu borada aniq mexanizmlar bormi?”

IMV Davlat budjeti departamenti direktori Sherzod Muhammedovning ta’kidlashicha, g‘olib bo‘lgan loyihalar doirasida bajariladigan ishlarning sifatiga bevosita o‘sha hududlardagi mas’ul tashkilotlar javobgar bo‘ladi.

“Amalga oshirilayotgan ishlarning sifati va nazorati bo‘yicha ishlar xuddi budjet tartib-tamoyillari asosida amalga oshiriladi. Masalan, ichki yo‘llarni ta’mirlashdagi ishlarning sifati va o‘z vaqtida amalga oshirilishiga mas’ul tashkilot javob berishi kerak bo‘ladi. Xususan, hududdagi obodonlashtirish boshqarmalari. Maktablarni ta’mirlash, jihozlash bo‘lsa, bevosita mas’ul tashkilotlar javobgar bo‘ladi.

Nimagaki, ishlarning sifatsiz amalga oshirilayotgani 2021-2022 yillarda ko‘p kuzatildi, bu ham aslida shaffoflik va ochiqlikning natijasi. Masalan, fuqarolarimiz shaxsiy kabinetlariga ishlar to‘liq bajarilmadi yoki sifatsiz bo‘ldi, deb turli xil rasmlar ham yuklashyapti. Biz esa bularni tegishli hududiy tashkilotlarga yuboryapmiz. Ayrimlariga tuman va shahar mas’ullari tomonidan rasmiy munosabatlar ham bildirilyapti.

O‘ylaymanki, bu jarayon asta-sekin o‘z yechimini topadi. Ertaga mas’ullar bu budjet mablag‘i nazoratini hamma ko‘radi, sifatli qilish kerak, deb ishlarini yaxshiroq qilishga harakat qiladi. Biz ochiqlikni, shaffoflikni oshiraversak, bu masalaga ham yechim topamiz”, – dedi Sherzod Muhammedov.

Ko‘proq yangiliklar: