16 март куни АОКАда Иқтисодиёт ва молия вазирлиги мутасаддилари иштирокида матбуот анжумани ўтказилди. Унда “Ташаббусли бюджет” лойиҳасининг амалга оширилиши ва  навбатдаги мавсум таҳлили юзасидан маълумот берилди.

Анжуманда Kun.uz мухбири “Ташаббусли бюджет”да ғолиб бўлган лойиҳаларнинг ижроси юзасидан жамоатчиликда қатор саволлар борлигини қайд этди: “Масалан, ички йўлларни таъмирлашда асфальтларнинг ўта сифатсизлиги бўйича. Айни пайтда Молия ва иқтисодиёт вазирлиги ушбу жараёнларни тўлиқ назорат қила оладими ва бу борада аниқ механизмлар борми?”

ИМВ Давлат бюджети департаменти директори Шерзод Муҳаммедовнинг таъкидлашича, ғолиб бўлган лойиҳалар доирасида бажариладиган ишларнинг сифатига бевосита ўша ҳудудлардаги масъул ташкилотлар жавобгар бўлади.

“Амалга оширилаётган ишларнинг сифати ва назорати бўйича ишлар худди бюджет тартиб-тамойиллари асосида амалга оширилади. Масалан, ички йўлларни таъмирлашдаги ишларнинг сифати ва ўз вақтида амалга оширилишига масъул ташкилот жавоб бериши керак бўлади. Хусусан, ҳудуддаги ободонлаштириш бошқармалари. Мактабларни таъмирлаш, жиҳозлаш бўлса, бевосита масъул ташкилотлар жавобгар бўлади.

Нимагаки, ишларнинг сифатсиз амалга оширилаётгани 2021-2022 йилларда кўп кузатилди, бу ҳам аслида шаффофлик ва очиқликнинг натижаси. Масалан, фуқароларимиз шахсий кабинетларига ишлар тўлиқ бажарилмади ёки сифатсиз бўлди, деб турли хил расмлар ҳам юклашяпти. Биз эса буларни тегишли ҳудудий ташкилотларга юборяпмиз. Айримларига туман ва шаҳар масъуллари томонидан расмий муносабатлар ҳам билдириляпти.

Ўйлайманки, бу жараён аста-секин ўз ечимини топади. Эртага масъуллар бу бюджет маблағи назоратини ҳамма кўради, сифатли қилиш керак, деб ишларини яхшироқ қилишга ҳаракат қилади. Биз очиқликни, шаффофликни ошираверсак, бу масалага ҳам ечим топамиз”, – деди Шерзод Муҳаммедов.