Polshada Ichki xavfsizlik agentligi xodimlari olti kishini Rossiya foydasiga josuslik qilganlikda gumon qilib qo‘lga oldi, deb xabar berdi Polshaning RMF FM radiostansiyasi 15 mart, chorshanba kuni. Hibsga olinganlar haqidagi ma’lumot keyinchalik Polsha hukumati vakillari tomonidan tasdiqlandi.
Radiostansiya ma’lumotlariga ko‘ra, qo‘lga olinganlarning barchasi «sharqiy chegaradan kelgan xorijliklar» bo‘lib, Rossiya maxsus xizmatlarida ishlagan. Muhim temiryo‘l kesishmalarida poyezdlar harakatini yozib olgan va ma’lumotlarni internetga uzatgan yashirin kameralar aniqlangach, gumondorlar qo‘lga olindi.
Jurnalistlarning so‘zlariga ko‘ra, gap o‘nlab shunday kameralar haqida ketmoqda. Ular asosan Podkarpak voyevodeligidagi temiryo‘llarda va Ukrainaga G‘arb qurollarini yetkazib berishda faol foydalaniladigan Jyeshuv-Yasenka aeroporti hududida o‘rnatilgan.
Britaniyaning VVS media-kompaniyasining rus xizmatiga ko‘ra, ushbu aeroport shu qadar muhim sanaladiki, AQSh armiyasi uni himoya qilish uchun Patriot havo mudofaa moslamalarini joylashtirgan. Aynan shu aeroportga AQSh prezidenti Jo Bayden uchib keldi, keyin u Kiyevga tashrif buyurdi.
Polsha harbiy kontrrazvedka xizmati (SKW) sobiq rahbari o‘rinbosari, polkovnik Matsey Matisyakning so‘zlariga ko‘ra, Rossiya maxsus xizmatlari kameralardan asosan Ukrainaga qurol-yarog‘ yetkazib berilgani haqida ma’lumot yig‘ish uchun foydalangan. Shu bilan birga, u ruslar qo‘lga kiritilgan ma’lumotlardan qo‘poruvchilik uyushtirish uchun foydalanishi mumkinligini istisno etmadi.
«Ushbu ma’lumotlardan qarshi choralar, jumladan, qo‘poruvchilik, sabotaj, yo‘q qilish kabi choralarni ko‘rish uchun foydalanish mumkin. Ruslar buni qilgan, qilyapti va qiladi. Biz hammamiz Chexiyadagi o‘q-dorilar zavodiga hujumni ko‘rdik», - deya tushuntirdi Matisyak.
Dekabr oyi oxirida Germaniya Federal razvedka xizmati rahbari Bruno Kal o‘z razvedka xizmati safida rossiyalik josus fosh etilganini e’lon qildi. Yanvar oyi oxirida ushbu rossiyalikning sherigi hibsga olingani haqida ma’lum bo‘ldi. Shuningdek, yanvar oyida Stokholm sudi ikki Shvetsiya fuqarosini Rossiya foydasiga josuslikda aybdor deb topib, ulardan birini umrbod qamoq jazosiga hukm qildi.
