Madaniyat va turizm vazirligi Germaniyada “Markaziy Osiyodagi yilning eng yaxshi turizm vazirligi” deya e’tirof etildi

Jamiyat 17:17 / 11.03.2023 8434

Ta’kidlash joizki, "PATWA" har yili dunyodagi eng yirik sayohat yarmarkasi hisoblangan "ITB Berlin" ("Internationale Tourismus-Börse Berlin") doirasida "PATWA International Travel Awards" tadbirini tashkil qiladi. Tadbirda 7 mingdan ortiq jurnalist, eksponent va 180 mamlakatdan sayyohlik sohasidagi mutaxassislar ishtirok etdi.

"PATWA International Travel Awards" mukofoti aviatsiya, mehmonxonalar, sayyohlik agentliklari va operatorlari, sayyohlik yo‘nalishlari, davlat idoralari, vazirliklar, xizmat ko‘rsatuvchi provayderlar kabi turizmni rivojlantirishda ishtirok etgan shaxslar va tashkilotlarga beriladi.

Taqdimot 7-9 mart kunlari Germaniyaning Berlin shahridagi “ITB Berlin” turizm ko‘rgazmasi doirasida bo‘lib o‘tdi. Mazkur ko‘rgazma 1966 yildan buyon turizm bo‘yicha dunyodagi yetakchi savdo yarmarkasi hisoblanadi.

Madaniyat va turizm vazirining birinchi o‘rinbosari Ulug‘bek A’zamov boshchiligidagi delegatsiya vazirlik mutasaddilari, “Milliy PR-markazi” DUK, “Uzbekistan airways” AJ, “Silk Road Samarkand” xalqaro sayyohlik markazi, O‘zbekiston sayyohlik kompaniyalari xodimlaridan iborat.

“ITB Berlin” turizm ko‘rgazmasidagi O‘zbekiston stendida mamlakatimiz milliy an’analari, urf-odat va marosimlari madaniy chiqishlar orqali namoyish etildi. Shu bilan birga, ko‘rgazmaning birinchi kunidayoq mamlakatimizning rasmiy vakillari yurtimiz turizm salohiyatini xorijda keng ommalashtirish va turistlar oqimi ko‘paytirish yuzasidan biznes uchrashuvlar o‘tkazishdi.

“BBC news” telekanali, Avstraliyaning “Lonely Planet” nashrlar kompaniyasi, Koreyaning “Surious Korea” sayohat kompaniyasi, Germaniyaning “Travel Dudes.com” media kompaniyasi va “Amadeus” IT-kompaniyasi, Turkmanistonning “Pearl of Asia” sayohat kompaniyasi, Saudiya Arabistonining “Saudi International Travel Company” sayohat kompaniyasi, shuningdek, Hindistonning “OTM” ko‘rgazmasi hamda “Indian Railway Satering & Tourism Corporation Ltd” turizm korporatsiyasi vakillari bilan uchrashuvlar tashkil qilinib, hamkorlik shartnomalari imzolandi.

"O‘zbekistonda bir necha bor bo‘lganman. Turizm infratuzilmasi, investitsiya borasida ham yaxshi o‘zgarishlarni ko‘ryapman. O‘ylaymanki, hozir mamlakat o‘z investitsiyalarini turizm sohasiga yo‘naltirishi uchun ayni vaqt, – dedi CNN vakili Imron Ahmad. – Biz O‘zbekiston turizm sohasi vakillari bilan muzokaralar olib bordik. Bugunga kelib Toshkent va Samarqand kabi shaharlardagi mehmonxonalar xorijiy sayyohlarni jalb qilishga tayyor. Markaziy Osiyo mamlakatlari orasida O‘zbekiston xalqaro sayyohlik uchun eng yaxshi rivojlangan turizm infratuzilmasiga ega".

Ko‘proq yangiliklar: