Norvegiya hukumati 10 yanvar kuni developerlar (yangi ko‘chmas mulk obektlarini qurish bilan shug‘ullanuvchi tadbirkorlar) zimmasiga yangi binolarda bombapanagohlarni ham qurish majburiyatini yuklashni rejalashtirmoqda, deb xabar beradi NRK teleradiokompaniyasi.

«Atrofimizda noaniqliklar ortib bormoqda. Biz mamlakat aholisi haqida qayg‘urishimiz va urush yoki qurolli hujum kabi yomon ssenariyni ham ko‘rib chiqishimiz kerak», — deydi adliya va jamoat xavfsizligi vaziri Emili Mel.

Bunday talablar maydoni ming metr kvadratdan oshadigan binolarga nisbatan qo‘llanadi. Panagoh ikki xil bo‘ladi: birinchisi kimyoviy va radioaktiv moddalardan, ikkinchisi esa oddiy qurollardan himoyani ta’minlash kerak.

Norvegiyada 1998 yilga qadar har qanday yirik turar joy kompleksida bombapanagoh bo‘lishi talab etiladigan qonunchilik normasi amalda bo‘lgan. U bekor qilinganidan keyin mamlakatda birorta ham yangi bombapanagoh qurilmagan.

Hukumatning ma’lum qilishicha, hozirda Norvegiyada 20 mingga yaqin panagoh mavjud. Ularga 2,5 million kishi sig‘adi — bu mamlakat aholisining 45 foizi demak. Boshqa Skandinaviya mamlakatlaridagi bombapanagohlar esa aholining 70-90 foiziga mo‘ljallangan.