Ready4Trade Markaziy Osiyo – Yevropa Ittifoqi tomonidan moliyalashtirilayotgan va Xalqaro savdo markazi tomonidan turli mamlakatlardagi sheriklar bilan yaqin hamkorlikda amalga oshirilayotgan to‘rt yillik loyiha. Loyiha mintaqa mamlakatlarida xalqaro savdoni rag‘batlantirish orqali Markaziy Osiyoning umumiy barqaror va inklyuziv iqtisodiy rivojlanishiga hissa qo‘shishga qaratilgan. Loyihaning benefitsiarlari hukumatlar, kichik va o‘rta korxonalar, xususan, ayollar tomonidan boshqarilayotgan korxonalar va tadbirkorlikni qo‘llab-quvvatlovchi tashkilotlardir.

Tadbirda savdo operatsiyalarini raqamlashtirish va qog‘ozsiz savdo tartibini joriy etish muhimligi qayd etildi. Bu, o‘z navbatida, tashqi savdo tartibotlaridan o‘tishni tezlashtirishga va chegaradan o‘tishni osonlashtirishga hamda savdoni rivojlantirishga ko‘maklashishga qaratilgan asosiy yo‘nalishlardan biri hisoblanadi.

Tadbir doirasida Xalqaro savdo palatasi ekspertlari Markaziy Osiyo davlatlari doirasida elektron sertifikatlashtirish tizimlarini o‘zaro qo‘llash tartibini joriy etish tashabbusi transchegaraviy elektron tijoratni rivojlantirish va mintaqaviy darajadagi raqamli savdo ekotizimining yaratishga ko‘maklashishga qaratilganini ham ta’kidladi.

Tovar kelib chiqishi to‘g‘risidagi sertifikatlarning elektron almashuvini joriy etishdan maqsad chegaralarda kelib chiqish sertifikatlarini so‘rash, qayta ishlash, topshirish va qabul qilish samaradorligini oshirishdan iborat bo‘lib, bu korxonalar tomonidan chegaradan o‘tish jarayoni va eksport tartib-qoidalariga rioya qilish uchun zarur bo‘lgan vaqtni qisqartiradi va ushbu jarayonlarning xavfsizligini oshiradi. 

Bundan tashqari, tizim mazkur hujjatlarni chiqaruvchi organlar va hududiy bojxona ma’muriyatlari o‘rtasidagi hamkorlikni chuqurlashtirish va samaradorligini oshirishga ham xizmat qiladi.