2023 йилги Миллий Футбол Лигаси (NFL) чемпионати финалида «Канзас-Сити Чифс» жамоаси «Филаделфия Иглз» клубини 38:35 ҳисобида мағлуб этди. Суперкубок (Super Bowl) эфиридаги 30 сониялик реклама нархи эса 7 млн долларга етди. 

Ушбу ўйин Америкада энг кўп телетомошабин тўплайдиган муҳим медиа тадбирларидан бири ҳисобланади. Унда америкача футболнинг энг зўр ўйинчиларидан ташқари, шоу-бизнес оламининг машҳурлари (бу гал Рианна) ҳам иштирок этади. Суперкубок NBC ва Fox компаниялари томонидан галма-гал трансляция қилинади. 

Қайд қилиш жоизки, Super Bowl ўйинида реклама учун 50 дақиқа ажратилган. Реклама вақтини 30 сониядан бошқа форматларда ҳам сотиб олиш мумкин - 15, 45 сония, 1 дақиқа ва ундан ортиқ. 1 сониянинг ўзига хос нархи буюртманинг умумий давомийлигига боғлиқ. Ташкилотчилар рекламадан умумий ҳисобда 700 млн доллар ишлаб олиши мумкин. 

NFL финалларини трансляция қилиш пайтида 30 сониялик рекламанинг нархи АҚШ спорт саноатида энг кўп кузатиладиган кўрсаткичлардан биридир. Суперкубок биринчи марта ўтказилган 1967 йилда 30 сониялик реклама нархи 40 минг долларга тенг эди. 10 йил ўтгач, нарх 125 минг долларга етди. 1996 йилда қиймат 1 млн долларга етди. 2017 йилда у 5 миллион долларни ташкил этди. 7 млн долларлик ҳозирги кўрсаткич ҳам бу маррада узоқ вақт ушланиб қолмаса керак.