Rossiya va belaruslik sportchilarning Parijdagi Olimpiada o‘yinlaridagi ishtiroki Xalqaro olimpiya qo‘mitasida (XOQ) hali muhokama qilinmagan, shuning uchun Ukraina rasmiylari tomonidan 2024 yilgi Olimpiada o‘yinlariga boykot e’lon qilish haqidagi tahdidlar «o‘rinsiz», deb ma’lum qildi tashkilot rahbari Tomas Bax Ukraina sport vaziri va Milliy olimpiya qo‘mitasi (MOQ) rahbari Vadim Gutsaytga yo‘llagan maktubida. Hujjatdan iqtiboslar 9 fevral, payshanba kuni Reuters tomonidan keltirilgan.
Baxning so‘zlariga ko‘ra, Ukraina rasmiylarining Rossiya va Belarus sportchilari hatto neytral bayroq ostida ham Olimpiada o‘yinlarida qatnashishiga yo‘l qo‘ymaslik haqidagi chaqiriqlari va Ukraina tomonidan o‘yinlarni boykot qilish haqidagi ogohlantirishlar «Olimpiya harakatining ko‘pchiligi tomonidan qo‘llab-quvvatlanmaydi».
Amaldor Ukraina MOQ tomonidan XOQ bilan bog‘liq turli organlarga yuborilgan tegishli xatlarni «bosim» va «qarorlar qabul qilinishiga ommaviy ta’sir ko‘rsatishga urinish» deb atagan, buni u «afsus bilan» qabul qilgani bildirilgan. Bundan tashqari, Baxning ta’kidlashicha, turli davlatlar tomonidan Olimpiya o‘yinlarining avvalgi boykotlari «o‘z siyosiy maqsadlariga erishmagan» va tajriba shuni ko‘rsatadiki, ular faqat sportchilarning o‘ziga zarar yetkazadi va bu Olimpiya xartiyasi tamoyillarini buzishdir.
Yanvar oyida Parij meri Ann Idalgo rossiyalik va belaruslik sportchilarni musobaqadan mahrum qilmaslik uchun neytral bayroq ostida Olimpiya o‘yinlarida ishtirok etishga ruxsat berishi mumkinligini aytgan edi. Ammo fevral oyi boshida u o‘z fikrini o‘zgartirib, bunday murosani «nomaqbul» deb atadi.
Rasmiyning so‘zlariga ko‘ra, Rossiya va Belarus sportchilarining Parijdagi o‘yinlarda ishtirok etishi Rossiyaning Ukrainaga qarshi urushi to‘xtatilgan taqdirdagina mumkin. «Boshqa davlatga hujum qilgan davlatga hech narsa bo‘lmagandek gapirishga va Ukrainaga bombalar yog‘ayotgan bir paytda delegatsiyaning Parijga kelishiga ruxsat berish mumkin emas», dedi u.
Rossiya va belaruslik sportchilarning Olimpiadada ishtirok etishi borasida munozaralar dekabr oyida, XOQ bu fikrni bildirganidan so‘ng va AQSh Olimpiya qo‘mitasi uni qo‘llab-quvvatlaganidan keyin davom etdi.
Oradan ko‘p o‘tmay, Litva, Latviya, Estoniya va Polsha tajovuzkor davlat va uning sherigi sportchilarining hatto neytral bayroq ostida ham xalqaro musobaqalarda ishtirok etishini qabul qilib bo‘lmaydi, deb e’lon qildi. Ukrainaning pozitsiyasini Buyuk Britaniya va Skandinaviya davlatlari ham qo‘llab-quvvatladi.
Bax Xalqaro olimpiya qo‘mitasining vazifasi «butun dunyoda barcha sportchilarni birlashtirish» ekanligini ta’kidladi, biroq Ukraina prezidenti Volodimir Zelenskiy «Olimpiya tamoyillari va urush bir-biriga tubdan zid», deb javob berdi.
