Germaniyaning Reynland-Pfals federal yeridagi bankrot bo‘lgan Frankfurt-Xan aeroporti Nyurburgring trassasiga egalik qiluvchi NR Holding'ga sotildi. Bu haqda 3 fevral, juma kuni dpa agentligi, shuningdek, SWR eshittirish korporatsiyasi ma’lum qildi.
Dpa ma’lumotlariga ko‘ra, NR Holding ortida rossiyalik oligarx va biznesmen Viktor Xaritonin turibdi. T-online.de uni Rossiya prezidenti Vladimir Putinning do‘sti deb ataydi.
Taxminan 20 million yevrolik notarius shartnomasi allaqachon imzolangan, deya xabar beradi dpa. Agentlik ma’lumotlariga ko‘ra, mablag‘lar ishonchli hisobraqamga o‘tkazilgan.
Xaritonin Yevropa Ittifoqining sanksiyalar ro‘yxatida yo‘q. Havo bandargohining bankrotligi munosabati bilan arbitraj menejyeri Yan Markus Platner hali kelishuvga izoh bermadi. Aeroport matbuot xizmati vakillari hozircha ma’lumotni tasdiqlamadi.
Rossiyalik tadbirkor ham xarid haqida izoh bermadi. Rossiyaning Forbes ro‘yxatida Viktor Xaritonin 1,4 milliard dollar (1,2 milliard yevro) boyligi bilan 66-o‘rinni egalladi. 2003 yilda u Rossiyaga, shu jumladan davlat shartnomalari bo‘yicha dori vositalarini yetkazib beruvchi yetakchi kompaniyalardan biri bo‘lgan «Farmstandart» xoldingining asoschilaridan biriga aylandi. Forbes ma’lumotlariga ko‘ra, 2021 yilda Xaritonin Sputnik V koronavirus vaksinasining eng yirik ishlab chiqaruvchisi bo‘lgan, uning onkologiya klinikalari esa butun Rossiya bo‘ylab, Kurskdan Kemerovogacha ochilgan.
Frankfurt-Xan aeroporti Frankfurt-Mayn va Lyuksemburg o‘rtasida joylashgan bo‘lib, uni ikkala shahardan taxminan 120 km masofa ajratib turadi. Havo bandargohi sobiq Amerika harbiy aerodromi bazasida jihozlangan.
Fuqarolik samolyotlarining birinchi parvozlari 1993 yilda amalga oshirilgan va 1999 yildan boshlab Irlandiyaning arzon Ryanair aviakompaniyasining parvozlari undan amalga oshirila boshlandi. Keyingi yillarda ushbu aviakompaniya Frankfurt-Xanni Germaniyadagi tayanch aeroportiga aylantirdi. Bundan tashqari, aeroport rahbariyati yuk tashuvchilar bilan hamkorlikni faol rivojlantirdi.
2007 yildan boshlab aeroportning yo‘lovchilar aylanmasi va yuk tashishdan tushgan daromadlar pasayishni boshladi. Havo yuklari sohasida raqobat kuchayib, biznesning rentabelligini tushirdi. Aeroport 2015 yilni 17,4 million yevro zarar bilan yakunladi. Reynland-Pfals federal yeri zarar ko‘rayotgan korxonani qayta-qayta subsidiyalashga majbur bo‘ldi. Natijada tender o‘tkazib, istiqbolli xaridor topishga qaror qilindi. Xitoyning Shanghai Yiqian Trading Company (SYT) kompaniyasi Reynland-Pfalsga 16 million yevro to‘lashga rozi bo‘ldi, biroq oxir-oqibat bitim yakuniga yetkazilmadi. 2021 yilning kuzida aeroport egalari bankrotlik to‘g‘risida ariza berishdi.
