3-5 феврал кунлари Тошкентда теннис бўйича Ўзбекистон ва АҚШ миллий жамоалари ўйинлари ўтказилади. Баҳслар Республика олимпия захиралари мактабининг ёпиқ кортларида бўлиб ўтади. 

Миллий жамоалар норасмий жаҳон чемпионати ҳисобланган Дэвис Кубоги саралаш босқичи доирасида ўзаро тўқнаш келади. Ғолиб жамоа сентябр ойида ўтадиган Дэвис Кубогининг 1/16 финал босқичига йўл олади. 

Учрашувнинг илк кунида иккита яккалик баҳси, иккинчи куни эса битта жуфтлик ва иккита яккалик баҳси ўтказилади. 

Қуръа натижасига кўра, 3 феврал куни Сергей Фомин АҚШ вакили Маккензи Макдоналд билан, Ҳумоюн Султонов эса Томми Пол билан кортга чиқади. 

4 феврал куни ўтадиган ўйинларнинг яккалик беллашувларида Санжар Файзиев (Ўзбекистон) – Остин Крайчек (АҚШ), Сергей Фомин (Ўзбекистон) – Ражив Рам (АҚШ) рўбарў келса, жуфтлик ўйинларда Сергей Фомин/Ҳумоюн Султонов тандеми Томми Пол/Маккензи Макдоналд билан куч синашади. 

Таққослаш учун, ATP рейтингида Томми Пол 32-, Макдоналд 63-ўриндан жой олган бўлса, Фомин 362-, Султонов 489-, Файзиев эса 1178-поғонани эгаллаб турибди. 

Жуфтлик баҳсларида иштирок этадиган Ражив Рам жуфтликлар рейтингида 3-, Крайчик эса 10-ўринда қайд этилган.