НАТО бош котиби мудофаа бюджети оширилишини истисно этмади

Жаҳон 13:54 / 25.01.2023 3995

НАТО давлатлари фақат Украинани қўллаб-қувватлабгина қолмай, балки ўз мудофаа қобилияти даражасини сақлаб қолиш ҳақида ҳам ўйлаши қилиши керак. Бу мудофаа харажатларини оширишни талаб қилади, дейди Йенс Столтенберг.

НАТО бош котиби Йенс Столтенберг Украинага қурол етказиб бериш НАТОга аъзо давлатларнинг мудофаа қобилиятини заифлаштириши мумкинлигидан огоҳлантирди. «Бизнинг Украинани қўллаб-қувватлаганимиз НАТОнинг қурол-яроғ ва ўқ-дорилар захирасини бўшатиб қўйди», — деди у 25 январь, чоршанба куни чоп этилган Die Welt газетасига берган интервьюсида. Бу қўллаб-қувватлаш, албатта, тўғри қадам ва Украина учун мутлақо зарур, деди Столтенберг. Аммо иттифоқ мамлакатлари ўз хавфсизлигини таъминлаш учун ҳам, Украинага янги ёрдам бера олиш учун ҳам захираларини тўлдириши керак. Шу муносабат билан, дейди бош котиб, яқин келажакда мудофаа учун бюджет харажатларини ошириш бўйича қарорлар қабул қилиниши мумкин. 2014 йилда НАТО иттифоқчилари ўн йил ичида мудофаа харажатларини миллий ялпи ички маҳсулотнинг (ЯИМ) 2 фоизига етказишни мақсад қилиб қўйган. Бу мақсад энди қайта кўриб чиқилиши керак, деди Столтенберг.

НАТО давлатлари нафақат Украинани қурол-яроғ билан қўллаб-қувватлаши, балки бу қуролларнинг тўғри ишлашига ишонч ҳосил қилиши керак. Бу, хусусан, етарли миқдордаги эҳтиёт қисмларни етказиб бериш, таъмирлаш базасини яратиш ва украиналик ҳарбий хизматчиларни мос равишда тайёрлашни назарда тутади.

НАТО раҳбари Россия томонидан таҳдид давом этаётганига ишора қилди. «Президент Путин Украинани забт этиш мақсадидан воз кечганини кўрсатувчи ҳеч нарса йўқ», деди Столтенберг. Аксинча, Россия раҳбари янги сафарбарликни истаяпти, Эрон ва Шимолий Корея режимлари билан қурол-яроғ етказиб бериш бўйича фаол музокаралар олиб бормоқда ва Украинадаги урушда ўн минглаб аскарларини қурбон қилишга тайёр, деди у.

Кўпроқ янгиликлар