Москва: «Адмирал Горшков» «Циркон» билан зарба бериш машқини амалга оширди

Жаҳон 13:51 / 25.01.2023 13647

Россиянинг «Совет Иттифоқи флоти адмирали Горшков» фрегати Атлантиканинг ғарбий қисмида «Циркон» гипертовушли ракетаси билан 900 кмдан ортиқ масофадаги денгиз нишонига «зарба бериш машқи»ни амалга оширди. Бу ҳақда ТАСС агентлиги Россия Мудофаа вазирлигига таяниб хабар бермоқда

Экипаж «компьютер моделлаштириши орқали гипертовушли ракета қуролларидан фойдаланиш бўйича машғулот ўтказди», деб таъкидлади идора. 

Аввалроқ ушбу кема Хитой ва Жанубий Африка ҳарбий-денгиз кучлари билан 17—27 февраль кунлари бўлиб ўтадиган қўшма машғулотларда иштирок этиши хабар қилинганди.

Аввалроқ «Адмирал Горшков» фрегати гипертовушли «Циркон» ракеталари билан қуролланган ҳолда Атлантика ҳамда Ҳинд океанлари бўйлаб жанговар саёҳатга чиққанди. 

«Адмирал Горшков» охирги йилларда рус ОАВда тез-тез тилга олинаётган фрегат бўлиб, Россия ҳарбий денгиз кучларига 2018 йилда қабул қилинган. Кема «Циркон» гипертовушли ракетаси синовида кўп марта қатнашган.

Кўпроқ янгиликлар