Krishtianu Ronaldu Saudiya Arabistoniga ko‘chib o‘tgach, portugaliyalik 37 yoshli yulduzning Messi bilan bir necha yillik qarama-qarshiligi tugagandek ko‘ringandi. Ammo taqdirni qarangki, Ronaldu Saudiya Arabistonidagi ilk o‘yinidayoq Messi, Mbappe va Neymar triosiga qarshi o‘ynaydigan bo‘ldi.
Bir yil avvalgi kelishuv
«PSJ»ning Saudiya Arabistoniga kelishi va Ronalduning arab diyoridagi debyuti aynan jahon chempioni Messiga qarshi to‘g‘ri kelayotgani ko‘pchilik tomonidan qatarlik va saudiyalik shayxlarning «ssenariysi» sifatida aytilayotgan bo‘lsa-da, aslida bu kelishuv so‘nggi ikki haftada emas, bir yil avval tuzilgan edi. Unga ko‘ra, JCh-2022dan keyin Fransiya chempionatida yuzaga keladigan yanvar oyidagi tanaffus paytida Parij klubi Ar-Riyodda mehmon bo‘lib, milliy chempionat yulduzlariga qarshi o‘rtoqlik bahsida to‘p surishi belgilangandi.
Taqdirni qarangki, Messi 2022 yil yakunidagi mundialni Saudiya Arabistoniga qarshi o‘yindagi sensatsion mag‘lubiyat bilan boshlagan bo‘lsa, yakunda Argentina bilan uzoq kutilgan chempionlikni qo‘lga kiritdi. Ronaldu esa yanvar oyi boshida «An-Nasr» taklifini qabul qilib, Ar-Riyodga ko‘chib o‘tdi. Barcha Messi va Ronaldu erasi tugadi deyotgan bir paytda taqdir bu yulduzlarni yana o‘zaro uchrashtirmoqda.
«PSJ» Saudiyaga yulduzli tarkib bilan keladi
Fransiya chempioni Saudiya Arabistonidagi o‘yinga kuchsiz va aralash tarkibi bilan emas, asosiy tarkibda keladi. 19 yanvar, payshanba oqshomidagi o‘yinda Kristof Galte Ronaldu yetakchiligidagi jamoaga qarshi Messi – Neymar – Mbappe triosini maydon tushirishi kutilmoqda. Bu o‘yinchilar Saudiyadagi safar oldidan Qatar poytaxti Dohaga ham tashrif buyurgan.
📍 Doha 🇶🇦@qatarairways I #PSGQatarTour2023 I #QatarAirways pic.twitter.com/nJaLDm52Z4
— Paris Saint-Germain (@PSG_inside) January 18, 2023
Fransiya chempionati doirasida safardagi so‘nggi ikki o‘yinda mag‘lubiyatga uchragan «Pari-Sen-Jyermen» Saudiya Arabistonidagi o‘rtoqlik bahsida mahalliy muxlislarga shunchaki xush kayfiyat ulashish maqsadida maydonga tushmasligi aniq. Ayniqsa, bu Messi va Ronaldu o‘rtasidagi o‘zaro so‘nggi to‘qnashuv sifatida aytilayotgan bir paytda.
«PSJ»ga qarshi Jaloliddin Masharipovni ham ko‘ramizmi?
Saudiya Arabistonidagi o‘yinda «PSJ»ning qaydnomasi ma’lum bo‘lib ulgurgan bo‘lsa-da, «An-Nasr» va «Al-Hilol» yulduzlaridan tashkil topadigan Ar-Riyod sha’nini himoya qiluvchi birlashgan tarkib hali rasman ma’lum qilinmagan. Shunga qaramay, bu tarkibdan o‘zbekistonlik Jaloliddin Masharipovning o‘rin olishi ehtimoli imkoniyati juda past. Chunki hujumkor chiziqda Ronaldudan tashqari yana bir qator yulduz futbolchilar tanlovi mavjud. Masharipov esa Krishtianu bilan til topishishga ulgurgan bo‘lsa-da, bu mavsum bor-yo‘g‘i 3 o‘yinda to‘p surib, samaradorlik ko‘rsata olmadi.
Hozirgacha ma’lum qilinishicha, «PSJ»ga qarshi «An-Nasr» darvozaboni David Ospina o‘ynamasligi oydinlashgan. «Napoli» va «Arsenal» sobiq darvozaboni jiddiy jarohat olib safdan chiqqan. Shu bois uning o‘rniga Saudiya Arabistoni milliy jamoasi hamda «Al-Hilol» darvozaboni Muhammad Al-Ovayis Ar-Riyod tarkibida maydonga tushadi.
Himoyadan hozirda «An-Nasr»da o‘ynayotgan 33 yoshli ispaniyalik himoyachi Alvaro Gonsales joy olishi kutilmoqda. «Espanol», «Vilyarreal» va «Marsel» sobiq futbolchisi o‘tgan yil Ar-Riyod klubiga o‘tgandi. Shuningdek, «An-Nasr»ga «Reyms»dan o‘tgan Gislen Konan ham shu kuni himoya chizig‘idan joy olishi mumkin.
Yarimhimoyadan «Bavariya» sobiq futbolchisi Luis Gustavo joy oladi. «An-Nasr»ning 35 yoshli futbolchisi joriy mavsum Saudiya chempionatidagi 13 bahsda 2ta gol va assistga mualliflik qilgan. Uning yonidan kolumbiyalik Gustavo Kuelyar o‘rin egallashi kutilmoqda. «Al-Hilol» futbolchisi joriy mavsumni yuqori darajada o‘tkazmoqda.
«An-Nasr» tomonidan 16 million yevroga sotib olingan argentinalik Gonsalo Martines, «Benfika» sobiq yarimhimoyachilari Andre Karrilo va Anderson Taliska ham maydon markazidan joy olishi kutilmoqda. Taliska joriy mavsum «An-Nasr» safida Saudiya chempionatidagi 11 o‘yinda 11ta golga mualliflik qildi. Shuningdek, Mateus Pereyra va «Portu» sobiq futbolchisi Mussa Marega ham «Al-Hilol» nomidan Ar-Riyod jamoasi safida «PSJ»ga qarshi o‘ynashi mumkin.
Hujum chizig‘ida Krishtianu Ronaldudan tashqari, kamerunlik Vensan Abubakar ham maydonga tushishi mumkin, ammo uning klubni tark etishi sababli bu haligacha so‘roq ostida qolmoqda. Shuningdek, «Al-Hilol»da o‘ynayotgan «MYu» sobiq hujumchisi Odion Igalo va «Atletiko» sobiq forvardi Lusiano Vettoni hujum chizig‘ida tushirilishi ehtimoli katta. Nigeriyalik goleador hozirda Saudiya chempionatida to‘purarlar ro‘yxatini boshqarmoqda.
Sardorlik bog‘ichi Ronalduga topshirildi
«Qirol Fahd» stadionida o‘tadigan uchrashuvda arab jamoalari futbolchilaridan iborat tarkibni Krishtianu Ronaldu sardor sifatida maydonga boshlab tushadi. 37 yoshli portugaliyalik futbolchi 16 yanvar kuni Saudiya Arabistoni futbol rahbariyati vakili Turki Ash-Shayxdan sardorlik bog‘ichini qabul qilib olgan.
الوعد ان شاءالله يوم ١٩ يناير … لقاء فوق الخيال … ومدير الفريق الكابتن خالد الشنيف ان شاءالله والتشكيلة غداً بيعلنها المدرب وخالد … اتمنى يومها ننسى الهلال والنصر ساعتين ونصير كلنا موسم الرياض… وبعد الساعتين نوقف الهدنة 😂🇸🇦❤️ pic.twitter.com/nttB07IgBb
— TURKI ALALSHIKH (@Turki_alalshikh) January 15, 2023
«PSJ» Ar-Riyod bilan o‘yindan 10 million yevro ishlab oladi
L'Équipe nashrining yozishicha, «PSJ» Ar-Riyoddagi o‘rtoqlik o‘yinidan 10 million yevro ishlaydi. Shu kuni Krishtianu Ronaldu va Lionel Messi to‘qnashuvi kuzatilishi bois chiptalarning onlayn savdosi boshlangach, qariyb 2 million muxlisdan chipta uchun ariza tushgan.
Messi va Ronaldu so‘nggi marta 2020 yilda o‘zaro to‘qnash kelgandi. O‘shanda «Yuventus» Chempionlar ligasi doirasida «Barselona»ni 3:0 hisobida mag‘lub etgan, portugaliyalik hujumchi dubl qayd etgandi. Bu safar Saudiya Arabistoni chempionati yulduzlari «PSJ»ga qarshilik ko‘rsata oladimi? Payshanba oqshomida kuzatamiz.
O‘rtoqlik uchrashuvi.
19 yanvar (payshanba)
Ar-Riyod (Saudiya Arabistoni) – PSJ (Fransiya)
Ar-Riyod, «Qirol Fahd xalqaro stadioni».
O‘yin boshlanish vaqti: 22:00.
TV-translatsiya: KSA Spors 1 HD.
Usmon Ibodov tayyorladi.
