So‘nggi kunlardagi transfer yangiliklari va mish-mishlar.
«Chelsi» Fernandesni transfer qiladi
Jurnalist Fabritsio Romanoning xabar qilishicha, «Chelsi» «Benfika» yarimhimoyachisi Enso Fernandesning transferi bo‘yicha jiddiy harakat qilmoqda. Insayder Nikolo Shiraning xabariga ko‘ra, London klubi «Benfika»ning 21 yoshli yarimhimoyachisi bilan 2028 yilga qadar mo‘ljallangan bitim borasida prinsipial kelishuvga erishgan. Argentinalik futbolchi Londonda yiliga 10 mln yevro maosh oladi.
«Chelsi» endi «Benfika» bilan muzokaralar ustida ishlamoqda. Portugaliya klubi 120 mln yevro so‘ramoqda — bu futbolchining shartnomasida belgilangan tovon puli, ammo ingliz klubi muzokaralar davomida bu narxni kamaytirishga harakat qiladi. Qayd etilishicha, futbolchiga da’vogarlar qatorida sanalgan «Liverpul» va «Manchester Yunayted» klublari tomonidan rasmiy taklif bo‘lmagan. Transfermarkt Fernandesning transferini 55 million yevroga baholagan.
Joriy mavsumda Fernandes «Benfika» safida barcha musobaqalarda 24 ta o‘yin o‘tkazib, 3 gol va 4 assistni o‘z hisobiga yozdirib qo‘ygan. U JCh-2022da 7 ta o‘yinda ham ishtirok etdi va 1 gol urdi, yakunda turnirning eng yaxshi yosh futbolchisiga aylandi.
Bellingem «Real»da paydo bo‘lishi mumkin
ESPN nashri ma’lumotiga ko‘ra, «Real» Dortmundning «Borussiya» klubi yarimhimoyachisi Jud Bellingem uchun qancha narx to‘lash borasida bir qarorga kelgan. Manbaning yozishicha, Madrid klubi 19 yoshli futbolchi transferi evaziga Dortmundga 100 million yevrodan ortiq mablag‘ o‘tkazib berishga tayyor.
Avvalroq, ayni vaqtda angliyalik ushbu yosh futbolchi «Liverpul» va «Real» klublaridan jiddiy qiziqish mavjudligiga qaramay, «Manchester Siti»ga o‘tib, Gvardiola bilan ishlashni istayotgani xabar qilingandi.
Bellingem «Borussiya» safida 2020 yil iyulidan buyon to‘p surib keladi. Uning klub bilan shartnomasi 2025 yil yoziga qadar mo‘ljallangan.
Ikardi — «An-Nasr»ga yo‘l oladi
TMW ma’lumotiga ko‘ra, «PSJ» hujumchisi Mauro Ikardi «An-Nasr»da Krishtianu Ronalduning jamoadoshiga aylanishi mumkin. Arab klubi vakillari Ikardining atrofidagilar bilan muzokaralarni boshlashgan. 29 yoshli argentinalikning o‘zi Saudiya Arabistoniga ko‘chib o‘tishga qarshi emas. Hozirda forvard Turkiyaning «Galatasaroy» klubida ijara asosida to‘p surmoqda. Transfermarkt uning transferini 17,5 million yevroga baholagan.
Mendi «Real»ni tark etishi mumkin
Footmercato ma’lumotiga ko‘ra, «Real» himoyachisi Ferlan Mendi «Nyukasl» klubi qiziqishlari doirasida turibdi. Inglizlar klubi 27 yoshli fransuzni qishki transferlar oynasi vaqtidayoq qo‘lga kiritmoqchi. Mendi «Real» safida 2019 yil yozidan buyon to‘p surib keladi. Uning Madrid klubi bilan shartnomasi muddati 2025 yil yoziga qadar amal qiladi.
Avvalroq, ispan klubi ushbu futbolchisi transferidan 50 million yevro ishlab olishni maqsad qilgani xabar qilingandi.
Suares — «Gremio»da
Braziliyaning «Gremio» klubi urugvaylik hujumchi Luis Suares transferini e’lon qildi. 35 yoshli futbolchi yangi klubi bilan ikki yillik shartnoma imzolagan. Faoliyatining eng yaxshi damlarini «Ayaks», «Liverpul», «Barselona» va «Atletiko» klublarida o‘tkazgan futbolchi 2022 yil yozida Urugvayning «Nasional» klubida o‘tkazdi. Uning bu klub bilan shartnomasi 2022 yil oxirida yakunlandi. Transfermarkt Suaresning transfer bahosini to‘rt million yevro etib belgilagandi.
Isko — «Salernitana»ga o‘tmoqda
Jurnalist Alfredo Pedullaning ma’lumotiga ko‘ra, «Sevilya»ning sobiq yarimhimoyachisi Isko «Salernitana» bilan shartnoma imzolashi mumkin. Italyan klubi prezidenti va sport direktori ushbu transfer ustida ish olib bormoqda. 30 yoshli ispaniyalikning yangi klubidagi maoshi bir mavsum uchun 1,5-1,8 million yevro atrofida bo‘lishi mumkin. 21 dekabr kuni ushbu futbolchi «Sevilya» bilan shartnomani bekor qilgandi, u ushbu klubda yarim mavsum o‘ynadi. Transfermarkt uning transferini to‘qqiz million yevroga baholagan.
Lovren «Lion» futbolchisi bo‘ladi
L'Equipe ma’lumotiga ko‘ra, «Zenit» himoyachisi Deyan Lovren «Lion»ga o‘tadi. Fransuz klubi 33 yoshli xorvatiyalik bilan og‘zaki kelishuvga erishgan. «Lion» «Zenit» bilan ham shartnomasi muddati yakuniga yarim yil vaqt qolgan Lovren uchun tovon puli miqdori bo‘yicha kelishib olgan. Lovren «Zenit» safida 2020 yil avgustidan buyon to‘p surib kelayotgandi. Transfermarkt portali futbolchining transferini 3,5 million yevroga baholagan.
Veber «Lids»ga transfer bo‘lishga yaqin
Salzburger Nachrichten ma’lumotiga ko‘ra, «Zalsburg» himoyachisi Maksimilian Veber qishki transferlar boshlanishi arafasida «Lids»da tibbiy ko‘rikdan o‘tgan.
Ingliz klubi 24 yoshli futbolchini safiga qo‘shib olgani haqida yaqin vaqtlar ichida rasman e’lon qilishi kutilmoqda. Avstriyalik futbolchi 2019 yil yozida «Sevilya»dan «Zalsburg»ga o‘tgandi. Uning shartnomasi 2025 yil yoziga qadar tuzilgandi. Transfermarkt futbolchining transfer qiymatini 12 million yevroga baholagan.