Sherzod Davlatovich Qudbiyev O‘zbekiston Respublikasi iqtisodiyot va moliya vaziri lavozimiga tayinlandi.

Sherzod Qudbiyev 1981 yil Farg‘ona viloyatida tug‘ilgan. 2000 yilda Farg‘ona politexnika institutini moliya va kredit mutaxassisligi bo‘yicha tamomlagan. 2007 yilgacha shu institutda ishlagan.

2007-2010 yillarda Bandlik va ijtimoiy himoya vazirligida turli lavozimlarda ishlagan, 2010-2016 yillarda Vazirlar Mahkamasida faoliyat yuritgan.

2016-2018 yillarda Toshkent shahri Mirzo Ulug‘bek tumani hokimi bo‘lgan, 2018-2019 yillarda Bandlik va mehnat munosabatlari vazirligiga rahbarlik qilgan, 2019-2020 yillarda prezidentning davlat xizmati va hokimiyat vakillik organlari bilan hamkorlik qilish masalalari bo‘yicha maslahatchisi lavozimida faoliyat yuritgan, 2020 yil mayidan buyon Davlat soliq qo‘mitasiga rahbarlik qilib kelayotgandi.

Prezidentning 2022 yil dekabridagi farmoni bilan Moliya vazirligi hamda Iqtisodiy taraqqiyot va kambag‘allikni qisqartirish vazirligi birlashtirildi, yangi vazirlik Davlat soliq qo‘mitasi va Davlat bojxona qo‘mitasini ham o‘z ichiga oldi.

Davlat bojxona qo‘mitasi raisi lavozimida ishlab kelgan Akmalxo‘ja Mavlonov endi Iqtisodiyot va moliya vazirligi huzuridagi Bojxona  qo‘mitasi raisi lavozimida ishlashda davom etadi.