Аргентиналик мухлислар франциялик мухлисларнинг футбол бўйича 2022 йилги жаҳон чемпионати финалини такроран ўтказиш ҳақидаги талабига жавоб беришди. Улар «Франция, йиғини тўхтат» номли петицияни Change.org порталига жойлаштиришди.

«Жаҳон чемпионати финалида мағлуб бўлган французлар йиғлашдан, нолишдан тўхтамаяпти ва Аргентина жаҳон чемпиони эканини тан олмаяпти. Ушбу петиция орқали французларни йиғлашни бас қилишга ва [Лионел] Месси футбол тарихидаги энг зўр эканини тан олишга ва [Килиан] Мбаппе унинг ўғлидек эканини қабул қилишга чақирамиз», дейилади унда. Хабар нашр этилган пайтда петицияни 500 мингга яқин одам имзолаган.

23 декабр куни француз мухлислари жаҳон чемпионатининг ҳал қилувчи ўйинини қайта ўтказиш талаби билан петиция эълон қилишган эди.

«Ҳакамлар мутлақо адолатсиз эди, пенальти йўқ эди, [Аргентинанинг] иккинчи голида Мбаппега нисбатан қўполлик қилинди!» деб ёзди мурожаат муаллифи. Петицияни 300 мингга яқин киши имзолаган.

Петиция кўриб чиқиш учун Халқаро футбол федерациясига (ФИФА) юборилиши режалаштирилмоқда.

Қатарда ўтказилган жаҳон чемпионати финалининг асосий ва қўшимча вақтидан кейин 3:3 ҳисоби қайд этилди. Пенальтилар сериясида эса Аргентина қўли баланд келган эди.

ФИФА тарихида жаҳон чемпионатлари финалларининг ҳеч бири такроран ўтказилмаган.