Telegram’da tarqalgan «josus virus» va videokuzatuv kameralaridan odamni yashiradigan «aqlli» kiyim - hafta texnodayjesti

Fan-texnika 11:42 / 11.12.2022 63929

Kuzatuv kameralaridan odamni yashira oladigan maxsus kiyim

Foto: Courtesy of Wei Hui

Uxan universiteti (XXR) aspirantlari Huawei kompaniyasining kiberxavfsizlik bo‘yicha innovatsiyalar tanlovida maxsus kiyimni namoyish etishdi. U sun’iy intellektga asoslangan videokuzatuv kameralarida odamning shaxsini yashirish imkonini beradi.

InvisDefense deb nomlangan «aqlli» palto tajriba sinovida kuzatuv kameralarining samaradorligini 57 foizgacha kamaytirgan. Kiyimga o‘rnatilgan issiqlik datchiklari va maxsus naqsh kuzatuv kameralarini chalg‘itish imkonini beradi. Shuningdek, kechasi paltoga o‘rnatilgan maxsus qurilmalar termal nurlanishni buzadi va shu bilan aqlli kameralarning infraqizil sensorlarini aldaydi.

Xitoyda sun’iy intellektning yuqori darajada rivojlangan videokuzatuv tizimi mavjud. Ko‘pgina fuqarolarning fikricha, davlat shu tarzda ularning shaxsiy hayotiga aralashib kelmoqda. Mazkur ixtiro bir tomondan, odamlarning shaxsiy hayotini kuzatishni cheklash imkonini bersa, boshqa tomondan noqonuniy maqsadlarda xavfsizlik tizimlarini chalg‘itish uchun ham ishlatilishi mumkin.

Tadqiqotchilar «aqlli» paltolarning har bir to‘plamini 500 yuandan (71 dollar) sotishni reja qilmoqda.

Telegram’da SIM-kartasiz ro‘yxatdan o‘tish imkoniyati paydo bo‘ldi

Foto: Telegram

Telegram ma’muriyati navbatdagi yangiliklar, jumladan, SIM-kartasiz akkaunt ochish imkoniyati haqida xabar berdi. 

«Telegram orqali muloqot qilganda telefon raqamini begonalardan yashirish imkoni bor edi. Foydalanuvchi uni kimga ko‘rsatishni o‘zi hal qilishi va telefon raqami orqali o‘zini topishni taqiqlashi mumkin edi. Endi esa maxfiylikning yangi davri boshlandi. Bundan buyon Telegram akkauntini blokcheyn asosidagi anonim raqamlardan foydalangan holda, SIM-kartasiz ro‘yxatdan o‘tkazish mumkin. Bunday raqamlarni Fragment platformasida xarid qilish mumkin», deyiladi ma’muriyat xabarida.

Bitta anonim raqamning narxi 9 TON (17 dollar atrofida) miqdorida belgilangan.

Rossiyada Instagram'ning mahalliy kloni

Foto: imago

Rossiyada Looky ijtimoiy tarmog‘i ishga tushirildi. Ushbu platforma rossiyaliklar uchun mamlakatda bloklangan Instagram o‘rnini egallashi kerak. Loyihaga kiritilgan sarmoyalar 160 million rublni (taxminan 2,5 million yevro) tashkil etdi. Ma’lumotlarga ko‘ra, mablag‘larning katta qismi Rossiya hukumati tomonidan ajratilgan.

Looky Instagram shaxsiy sahifasidagi barcha kontentni, jumladan, foydalanuvchi nomini bir marta bosish orqali yangi ijtimoiy tarmoqqa o‘tkazish mumkinligini va’da qilmoqda.

«Biz 2024 yilga borib rossiyalik Instagram foydalanuvchilarining kamida 10 foizini jalb qilishimiz mumkin», dedi loyiha rahbari Yegor Yakovlev taqdimotda. Shu bilan birga, Yakovlev asl Instagram'da bo‘lmagan «yangi xususiyatlarni» e’lon qildi. Hozircha, yagona farq tashqi havolalarni to‘g‘ridan to‘g‘ri postlarda nashr qilish imkoniyatidir (Instagram'da ularga faqat profil sarlavhasida va hikoyalarda ruxsat berilgan).

Telegram’da «josus virus» tarqaldi

Foto: TASS

Positive Technologies kompaniyasi Telegram messenjeri orqali boshqariladigan zararli TgRAT virusini aniqladi.

Virus foydalanuvchiga quyidagicha zarar keltirishi mumkin:

  • akkauntni butunlay o‘chirib yuborish;
  • yozishmalarni fayl ko‘rinishida saqlab olish;
  • botlarni ishga tushirish;
  • turli ko‘rinishdagi fayllarni ko‘chirib olish;
  • ekrandagi hodisalarni saqlab qolish.

Shu jihatdan, mutaxassislar trafik tahlilini olib boradigan dasturiy ta’minotdan foydalanishni tavsiya qilmoqda.

Eng qimmat elektron kitob

Foto: Xiaomi

Xiaomi kompaniyasi Xiaomi Note deb nomlangan eng qimmat elektron kitobini taqdim etdi. Qurilma 10,3 dyuymli ekran va 4096 bosim darajasini sezadigan elektromagnit qalamga ega. Unga Duokan Reading, WeChat Reading, Bilibili Comics, WPS kabi dasturlar o‘rnatilgan. Epub, txt, pdf va boshqa fayllarni qo‘llab-quvvatlaydi.

Elektron kitobga ikki diapazonli Wi-Fi 2,4/5 GGs o‘rnatilgan, 3 Gb tezkor va 64 Gb ichki xotiraga, shuningdek, 3000 mA/soat sig‘imli akkumulyatorga ega. Xiaomi Note’ning narxi 360 dollar.

Artemis 1 missiyasi

NASA tomonidan uchirilgan «Orion» kosmik kemasi Oyni aylanib o‘tdi va gravitatsiya kuchidan foydalanib, Yer sari yo‘l oldi. 

Ekipajsiz kapsula o‘zining eng yaqin nuqtasida Oy yuzasidan 130 km masofada uchib o‘tdi va turli manyovrlarni sinab ko‘rdi. Ushbu manyovrlardan odamlarni kelajakda Oyga yuborish jarayonida foydalaniladi.

Kapsula Oyning orqa tomoniga o‘tganida, u bilan aloqa 30 daqiqaga uzilib qoldi. Shundan so‘ng Kapsula asosiy dvigatellari uch daqiqadan ko‘proq vaqt davomida ishga tushirilib, uni Yerga yo‘naltirdi.

Missiyaning keyingi bosqichi Artemis II deb nomlanadi va unda odamlar ekipaji Oyga parvoz qilib, uni aylanib o‘tadi, biroq qo‘nmaydi.

Artemis III missiyasi doirasida erkak va ayol astronavtlar Oy yuzasiga qo‘nadi. Bu 2025 yildan keyin amalga oshirilishi rejalashtirilgan.

Ko‘proq yangiliklar: