Qosim-Jo‘mart To‘qayev kelasi oy boshida O‘zbekistonga keladi

24 noyabr kuni xorijiy davlatlarning mamlakatga yangi tayinlangan elchilari tomonidan ishonch yorliqlarini topshirish tantanali marosimi bo‘ldi.

O‘zbekiston prezidenti Shavkat Mirziyoyev Koreya elchisi Kim Xi Sang, Qirg‘iziston elchisi Musa Jamanbayev, Jazoir elchisi Bumediyen Gennad, Qozog‘iston elchisi Beybut Atamkulov, Amerika Qo‘shma Shtatlari elchisi Jonatan Xenikdan ishonch yorliqlarini qabul qilib oldi.

Prezident matbuot xizmati xabariga ko‘ra, dekabr oyi boshida Qozog‘iston prezidentining O‘zbekistonga tashrifi kutilyapti.

“Qozog‘iston asrlar davomida qalin do‘st va yon qo‘shnimiz, strategik hamkor va yaqin ittifoqchimizdir. So‘nggi yillarda ikki tomonlama aloqalarning sur’ati yuqori bo‘lib kelmoqda. Parlamentlararo munosabatlar, hududlar o‘rtasidagi hamkorlik izchil rivojlanmoqda”, deyiladi xabarda.

Ma’lum qilinishicha, ustuvor sohalarda 3 milliard 500 million dollarlik investitsiya loyihalari amalga oshirilmoqda. O‘zaro savdo hajmi ham muttasil o‘sib boryapti. Bu ko‘rsatkich yil boshidan buyon 20 foizga ortib, 4 milliard dollarga yaqinlashgani mamlakatlar salohiyati katta ekanini ko‘rsatadi.

“Yaqinda Qozog‘istonda bo‘lib o‘tgan O‘zbekiston madaniyati kunlari ham ikki qardosh elni yanada yaqinlashtirishga xizmat qildi. Dekabr oyi boshida Qozog‘iston prezidentining O‘zbekistonga kutilayotgan tashrifi davlatlararo munosabatlarda yangi davrni boshlab berishiga ishonch bildirildi”, deyiladi rasmiy ma’lumot matnida.