Maktab direktori lavozimiga nomzodlar menejyerlik sertifikatini olishi kerak bo‘ladi

“Maktab direktori lavozimiga nomzodlarga menejyerlik sertifikatini berish tartibi to‘g‘risidagi nizomni tasdiqlash haqida”gi hukumat qarori loyihasi e’lon qilindi.

Xalq ta’limi vazirligi tizimidagi maktablarda direktor lavozimida faoliyat olib borish huquqini beruvchi menejyerlik sertifikatini berish tartibini nazarda tutuvchi maktab direktori lavozimi nomzodlariga menejyerlik sertifikatini berish tartibi to‘g‘risida nizom tasdiqlanadi.

Xalq ta’limi vazirligi 2023 yil 1 yanvardan boshlab A.Avloniy nomidagi pedagoglarni kasbiy rivojlantirish va yangi metodikalarga o‘rgatish milliy-tadqiqot instituti tuzilmasida yuridik shaxs maqomiga ega bo‘lmagan Xalq ta’limi xodimlari bilim darajasi va kasbiy mahoratini baholash markazi maxsus portali orqali nomzodlarga boshqaruv sohasiga oid bilim ko‘nikmalarini baholash va natijasi bo‘yicha davlat namunasidagi menejyerlik sertifikatini elektron raqamli imzo bilan tasdiqlangan va QR-kod qo‘yilgan elektron shaklda berish tizimini joriy qiladi.

Nizomga ko‘ra, umumta’lim maktabi direktor lavozimiga nomzodlar boshqaruv sohasiga oid bilim ko‘nikmalarini baholash va natijasi bo‘yicha davlat namunasidagi menejyerlik sertifikatini berish A.Avloniy nomidagi pedagoglarni kasbiy rivojlantirish va yangi metodikalarga o‘rgatish milliy-tadqiqot instituti tuzilmasida Xalq ta’limi xodimlari bilim darajasi va kasbiy mahoratini baholash markazi maxsus portali orqali nomzodlarga elektron raqamli imzo bilan tasdiqlangan va QR-kod qo‘yilgan elektron shaklda amalga oshiriladi.

Nizom talablari amalda faoliyat olib borayotgan umumta’lim muassasalari direktorlariga tatbiq etilmaydi. Sertifikat 3 yil davomida amal qiladi. Nomzodlar sertifikat amal qilish muddati davomida ham navbatdan tashqari sertifikat olishi bo‘yicha test sinovlarida ishtirok etishi mumkin.

Maktab direktori lavozimiga nomzodlar menejyerlik sertifikatini olish uchun milliy-tadqiqot institutida maxsus pulli dasturlar asosida jamoada ishlash va ota-onalar bilan muloqot qilish, boshqaruv, moliyaviy hisob-kitoblarni amalga oshirish hamda axborot-kommunikatsiya texnologiyalari ko‘nikmalariga o‘qitiladi. Milliy-tadqiqot institutida maxsus pulli dasturlar nomzodlar va institut tomonidan tuzilgan shartnoma asosida o‘qitiladi. Menejyerlik kursida bir tinglovchi o‘qish xarajatlari milliy-tadqiqot instituti tomonidan ishlab chiqiladi va tasdiqlanadi.

Sertifikat olish uchun nomzodlardan bazaviy hisoblash miqdori bir baravari miqdorida bir martalik to‘lov undiriladi. To‘lovlar milliy-tadqiqot instituti budjetdan tashqari hisobvaraqlariga o‘tkaziladi. Markaz faoliyati, xodimlar ish haqi to‘lovlari milliy-tadqiqot instituti budjetdan tashqari mablag‘lari hisobidan moliyalashtiriladi.

Nomzodlar test sinovlariga uzrli sababga (vaqtincha mehnatga qobiliyatsizligi, davlat yoki jamoat vazifalarini bajargani, yaqin qarindoshi vafoti) ko‘ra kelmagan bo‘lsa, ular test sinovlari boshqa muddatga ko‘chiriladi va to‘lov summasi takroran undirilmaydi. Menejyerlik kursida yoki sertifikat berish test sinovlarida umumta’lim maktab direktori lavozim malaka tavsiflarida belgilangan talablariga ega bo‘lgan nomzodlar ishtirok etish huquqiga ega.