Ҳафта ўйинлари: «Ливерпул» Лондонда меҳмон, Германия ва Италияда дербилар 

Спорт 16:23 / 08.10.2022 14222

БРАЙТОН – ТОТТЕНҲЭМ (8 октябр, 19:00) 

Ўтган турда бу жамоалардан деярли тескари натижа кутилган эди. «Брайтон» Ливерпулга сафар қилди ва айниқса, Поттернинг «Челси»га ўтиб кетганидан кейин, жамоада имконият йўқдек кўринганди. Лекин «Брайтон» ҳатто ғалабага ҳам яқин бўлди, икки тўп фарқи билан олдинда бориб, жанговар 3:3 ҳисобидаги дурангни қайд этди. «Тоттенҳэм»нинг қарши ҳужумга таянилган прагматик ўйини учун эса, бугунги «Арсенал» анча мос кўринган бўлиши эҳтимол, лекин якунда Артета шогирдлари ишончли ғалабага эришди. Умуман, «Тоттенҳэм» барча мусобақаларда охирги 4 ўйиннинг фақат биттасида ғалаба қозонгани Конте учун огоҳлик қўнғироғи бўлиши керак. Хуллас, кучли тўртликдан жой олган икки жамоа ўртасидаги баҳс анча қизиқарли ўтиши кутилмоқда.

Айниқса, ўзаро ўйинлар рақибларнинг анча муносиб эканини кўрсатмоқда. Сўнгги 4 мавсумнинг фақат биттасида «Тоттенҳэм» уйда ва сафарда ғалаба қозонган холос, қолган уч мавсумда ҳар икки томон биттадан ғалаба қозонгани ҳам кўп нарсани айтиб турибди. Апрел ойида бўлиб ўтган охирги тўқнашувда эса, Троссарнинг сўнгги дақиқалардаги голи учрашув тақдирини ҳал қилганди. Айнан Троссар ҳозир ҳам жуда яхши спорт формасига кирган – юқорида тилга олинган «Энфилд»даги ўйинда у ҳет-трик муаллифи бўлганди.

Йўқотишлар ҳақида. Бир позицияда ҳаракат қиладиган Моура ва Кулушевски бир неча кунга сафдан чиқишган. Демак, бугун асосий таркибда ҳам Ришарлисон, ҳам Сонни кўришимиз мумкин бўлади. Шунингдек, «Арсенал»га қарши ўйинда ўнг қанот ҳимоячиси Эмерсон қизил карточка олганди. «Брайтон» таркибида жароҳатланганлар йўқ.

Бундан ташқари, «Брайтон» сўнгги ўйинини бир ҳафта олдин ўтказиб, тайёргарлик учун етарли вақтга эга бўлгани, «Тоттенҳэм» эса, сешанба оқшомида «Айнтрахт»га сафар қилгани жисмоний томондан мезбонларга қўшимча устунлик тақдим этиши мумкин. 

МИЛАН – ЮВЕНТУС (8 октябр, 21:00)  

Шубҳасиз, Италиянинг энг номдор икки клуби – бири А Сериядаги ғалабалар бўйича пешқадам бўлса, иккинчиси, Европа турнирларида энг совриндор Италия клуби ҳисобланади. Шунингдек, бу жамоалар ўртасидаги рақобат соф футбол майдонида эканини ҳам айтиш керак. Масалан, «Милан»нинг «Интер» билан муносабатлари тўлақонли дерби мақомида, «Ювентус» эса, 2006 йилдаги «Моджиполи» воқеаларида чемпионлик «Интер»га олиб берилгани учун ҳам қандайдир футболдан каттароқ зиддият бор. «Ювентус» ва «Милан» тўқнашуви эса асосан футбол майдонида кечган, ҳар икки жамоада ўйнаган футбол юлдузлари жуда кўп.

Клублар ўйинга турли кайфиятда етиб келишмоқда. «Милан» Лондонда йирик ҳисобда ютқазиб, ЕЧЛ гуруҳида жуда қийин аҳволда қолди, уч кун ўтиб «Челси»га қарши яна бир ҳал қилувчи баҳс кутиб турибди. «Ювентус» эса, ниҳоят, 5 ўйинли ғалабасиз сериядан сўнг, аввал А Серияда «Болонья», кейин ЕЧЛда «Маккаби» дарвозасига учтадан гол урди. Миландаги ғалаба туринликларни кучли тўртликка яқинлаштиради. «Милан» эса яқинда «Наполи»га ютқазган бўлса-да, Италияда пешқадамдан у қадар ортда қолиб кетмаган, биргина ғалаба Пиоли шогирдларини ҳатто 1-ўринга қайтариши мумкин.

Ҳар икки жамоа, табиийки, оптимал формадан узоқ, буёғига ҳар қандай топ-жамоада шундай бўлиб бораверади. Жамоалар уч кун олдин ЕЧЛда ўйин ўтказишди, бунинг устига жароҳатлар кўп. Мезбонлар сафида асосий дарвозабон Менян, сардор Тео Эрнандес, Калабрия, Салемакерс, Мессиас, Флоренци, Кьер ва Златан Ибраҳимович ушбу ўйинда шерикларига ёрдам бера олишмайди. «Ювентус»дан эса Де Шильо ва Погбадан ташқари, дисквалификация туфайли Анхел Ди Мария ҳам майдонга туша олмайди. «Маккаби»га қарши ўйинда учта ассистни амалга оширган аргентиналик футболчи «Монца»га қарши учрашувда ҳакам томонидан четлатилганди. 

БОРУССИЯ Д – БАВАРИЯ (8 октябр, 21:30) 

«Бавария»нинг ёмон старти баъзи йилларда бўлиб туради ва бу Бундеслига мухлислари учун лотереядан чиққан ютуқдек кўринса керак. Чунки мюнхенликларнинг ёмон бошлаши одатда, ҳеч бўлмаса, мавсумнинг иккинчи ярмигача лигада интригани ушлаб туради. «Боруссия» каби жамоалар учун ҳам бу айни муддао – 8 турдан кейин «Бавария» билан тенг очкога эга бўлиш ҳам ёмон эмас. Шундаям, «Кёльн», «Лейпциг» ва «Вердер»га қарши ўйинлардаги мағлубиятлар билан. Агар «Бавария»нинг одатий мавсумларидан бири бўлганида, бундай мағлубиятлар билан «Боруссия» чемпионликдан умидини узиб бўларди. 

Левандовскининг кетиши, Садио Маненинг жамоага тўлиқ сингиб улгурмагани, Нагелсманнинг баъзи тушунарсиз қарорлари натижасида «Бавария» лигада ғалабасиз уч ўйин ўтказди, ҳатто истеъфо ҳақида ҳам фикрлар пайдо бўла бошлаганди. Аммо охирги турда «Байер», кейин ЕЧЛда «Виктория» устидан умумий ҳисобда 9:0 ҳисобидаги ғалаба мюнхенликларнинг яхши формага қайтганини далолат қилмоқда. Бунинг устига айнан Дортмундга қарши ўйинларда «Бавария» ажойиб натижа қайд этиб келмоқда – охирги 8 ўйинда мюнхенликларнинг қўли баланд келган. Бундеслига доирасида охирги марта 2018 йилнинг ноябрида «Бавария» Дортмунддан очкосиз қайтган.

Жароҳатларга тўхталсак, меҳмонлар сафида Томас Мюллерда ковид аниқлангани ҳақида хабарлар чиқди. Яна камида бир ҳафта у шерикларига ёрдам бериши даргумон. Шунингдек, бир ой олдин сафдан чиққан Лукас Эрнандес ҳали тикланиб улгургани йўқ. Терзич жамоаси таркибида эса, Рейна ва Дауд ўйнай олмайди. 

УДИНЕЗЕ – АТАЛАНТА (9 октябр, 18:00) 

Ўтган мавсумда Италиянинг уч «аждарҳоси» чемпионлик учун курашиб, ёзда яна бир қатор трансферларни амалга оширгач, жиддийроқ пойга кутилганди, лекин қарангки, 9-турга келиб, пешқадамлик масаласини ҳал қиладиган ўйинда «Удинезе» ва «Аталанта» ўйнамоқда.

Нафақат «Удинезе», балки «Аталанта»нинг ҳам старти кўпчилик учун сюрприз, зеро ўтган мавсумни бергамоликлар жуда ёмон якунлашганди. Шунингдек, Гасперини жамоаси биз ўрганиб қолган услубдан анча узоқ ҳолда очколарни қўлга киритаётганини таъкидлаш керак. Доимо «Аталанта» етакчи бўлган кўрсаткичлар – тўп назорати, яратилган вазиятлар, зарбалар ва рақамларда жамоа лига аутсайдери бўлишига қарамасдан, ўз имкониятларидан ўта унумли фойдаланмоқда. Ўтган 8 турда «Аталанта» атиги 3 марта ўз дарвозасидан гол ўтказиб юборди – бунақасини қаерда кўргансиз?

«Удинезе» эса, бизни яқин тарихга, ўша Ди Натале – Санчес жуфтлигининг сермаҳсул ўйинларига етакламоқда. «Наполи»ни қўшмаса, Андера Соттил шогирдлари Италиянинг энг ёрқин жамоаси бўлиб турибди. Бразилиялик ҳимоячи Родриго Бекао эса,нафақат А Серия, балки Европада кашфиёт бўлди – у жуда кўп ҳимоявий кўрсаткичлар бўйича кучли бешлик лигаларидан пешқадам бўлиб турибди. «Удинезе»нинг ғалабали серияси 6 ўйинга етди – рақиблар ичида «Интер», «Рома», «Фиорентина» ва «Сассуоло» каби кучли жамоалар бўлганини алоҳида таъкидлаш керак. Пешқадамлардан фарқли равишда «Удинезе»га ва албатта «Аталанта»га ҳам еврокубокларда қатнашмаётгани қўл келмоқда. «Интер», «Милан», «Ювентус» ва «Наполи» Чемпионлар Лигаси туфайли ҳар уч кунда ўйнашига тўғри келаётган бўлса, бу жамоаларда дам олиш учун ҳам, рақибга тайёргарлик бўйича ҳам икки баробар кўпроқ вақт бўлади. Ким билади, орага мундиал ҳам кирган бу тиғиз мавсумда ушбу устунлик ҳам ҳал қилувчи даражада таъсир ўтказиб, «Аталанта» ёки «Удинезе»ни, балки иккаласини ҳам кутилганидан юқорироқ ўринда кўришимиз мумкин бўлар? 

АРСЕНАЛ – ЛИВЕРПУЛ (9 октябр, 20:30) 

АПЛ пешқадами кучли тўртлик ўринларига яқинлашишга уринаётган рақибга қарши. Сўнгги бир неча йиллар бу таъриф тескари ишлатилган, аммо бу сафар ундай эмас – «Арсенал» ажойиб старт туфайли, ҳатто даҳшатли «Манчестер Сити»ни ҳам ортда қолдирмоқда, «Ливерпул» эса, аксинча, бироз омадсиз, бироз кучсиз ўйинлардан сўнг, жуда кўп очко йўқотиб юборди. «Фулҳэм», «Брайтон», «Эвертон» ва «Кристал Пэлас»га қарши ўйинларда дурангни Юрген Клопп умуман режалаштирмагани аниқ.

«Олд Траффорд»даги мағлубият бироз соя солган бўлса-да, «Арсенал» Шимолий Лондон дербисида яна жиддий мақсадини исботлади – «Тоттенҳэм» билан ўйинда ишончли ғалаба қайд этилди. «Ливерпул» янада жиддийроқ синов, айниқса руҳий томондан, зеро охирги 19 ўзаро ўйиндан атиги 1 тасида «Арсенал» ғалаба қозона олган, холос. Сўнгги 6 ўйинда эса, умуман лондонликлар «Ливерпул» дарвозасини ишғол қила олмаяпти. «Эмирейтс»да ўтказилган баҳорги ўйинда ҳам меҳмонлар 2:0 ҳисобида ғалаба қозонганди.

Ҳар икки жамоа ҳафта ўртасида еврокубокда иштирок этди. «Ливерпул» қаторасига иккинчи ғалабасига эришиб, ЕЧЛдаги ҳолатини яхшилаб олди. «Арсенал» эса пайшанба оқшомида ўйнаган бўлса-да, норвегияликларга қарши аралаш таркибда ҳаракат қилди. Яъни муҳим ўйинга ҳар икки жамоа яхши спорт формасида ва кайфиятда бўлади. Фақат жароҳатлар борасида меҳмонларда вазият оғирроқ. Кейта, Жонс ва Окслейд-Чемберленнинг жароҳати янгилик эмас, шунингдек, Эндрю Робертсон ҳам ўйнай олмайди. Ливерпулликларнинг кечаги машғулотларида Тьяго Алкантара яна кўринмагани ҳақида хабарлар чиқди. Испаниялик яримҳимоячи ўзи яқинда майдонга қайтган ва охирги уч ўйинда асосий таркибда тушаётганди. «Арсенал» таркибида Смит Роу йил охиригача сафдан чиққан, Муҳаммад эл-Ненни ҳам бир неча кун жамоага ёрдам бера олмайди. 

ЭВЕРТОН – МАНЧЕСТЕР ЮНАЙТЕД (9 октябр, 23:00) 

Эрик тен Ҳаг матбуот анжуманида айтишича, жамоасининг Кипрдаги ўйини шунчаки чигалёзди, дербидаги йирик мағлубиятга жавоб айнан эртага бўлиб ўтадиган учрашувда берилар экан. Яъни «Юнайтед» «Этиҳад»даги шармандали натижа учун мухлислар олдида қарзини «Эвертон»га қарши ўйинда қайтаради.

Табиийки, булар фақат сўз билан бўладиган ишлар эмас, зеро манчестерликларга осон бўлмаслигига бир қатор асослар бор. Биринчидан, «МЮ» Европа Лигасидаги масаласини ҳал қилмагани ҳамда янги мураббий қўл остида футболчилар имкон қадан кўпроқ ўйинга муҳтож бўлганидан, тен Ҳаг барча ўйинларда асосий таркибни туширяпти. Демак, бир қатор асосий таркиб футболчилари пайшанба оқшомида Кипрда тўлиқ ҳаракат қилишди. Чарчоқ борасида муаммолар пайдо бўлиши турган гап. Иккинчидан, табиийки, «Эвертон» ўз ҳолича ҳам кучли - 7 ўйиндан бери мағлубиятга учрагани йўқ. Ҳатто «Ливерпул» ҳам «Гуддисон Парк»дан атиги бир очко олиб кетган. Умуман, Лэмпард жамоаси бугунги кун ҳолатига АПЛда энг кам гол ўтказган жамоа бўлиб турибди. Пикфорд 8 учрашувда 7 марта ўз дарвозасидан тўп олиб чиққан.

Яна бир қизиқ факт, Фергюсондан кейин «МЮ»да ишлаган мураббийлар учун «Гуддисон» алоҳида ноқулай сафар ҳисобланади. Луи ван Гаал илк ўйинида 0:3, Сульшер 0:4, Мойес 0:2, Рангник эса, 0:1 ҳисобида мағлубиятга учраган. Фақатгина Жозе Моуриньо илк мавсумида ушбу стадиондан очко олиб кетганди – 1:1. Энди Эрик тен Ҳаг «МЮ» мураббийлари учун «Гуддисон»да янги саҳифа очиш учун ҳаракат қилиб кўради.

Таркибларга келсак, матбуот анжуманида тен Ҳаг Варан машғулотларга қайтгани, лекин асосий таркибда тушиш учун тайёргарлиги сўроқ остида эканини таъкидлади. Донни ван де Бек ва Ҳарри Магуайр тўлиқ тикланишгани йўқ. Лекин Рэшфорд ва Марсиял жароҳатдан тўлиқ фориғ бўлишгани меҳмонлар учун яхши янгилик. Мезбонлар сафида йўқотишлар кўпроқ – Таунсенд ва Годфри биратўла мундиалдан кейин қайтишади. Йерри Мина тўлиқ тикланиб улгургани йўқ, шунингдек, Ҳолгейн ва Петтерсон тиззадан олган жароҳат туфайли ўйнай олишмайди. 

БОШҚА ЎЙИНЛАР

8 октябр. Сассуоло – ИНТЕР (18:00), ЧЕЛСИ – Вулверҳэмптон (19:00), МАНЧЕСТЕР СИТИ – Саутҳэмптон (19:00), АТЛЕТИКО – Жирона (19:15), Реймс – ПСЖ (23:55), Хетафе – РЕАЛ (23:55)

9 октябр. Кремонезе – НАПОЛИ (21:00), Штутгарт – ЮНИОН (23:30), РОМА – Лечче (23:45), БАРСЕЛОНА – Селта (23:55).

Кўпроқ янгиликлар