Bosh prokuratura matbuot xizmatining Kun.uz’ga xabar berishicha, Qashqadaryo viloyati Koson tumani hududida joylashgan temiryo‘lning Koson—Sug‘diyona poyezd bekatlari oralig‘ida harakatlanayotgan yuk poyezdi 19 yoshli qizni urib yuborgan.

Ma’lum bo‘lishicha, 2022 yil 25 sentabr kuni soat 13:42 larda Qashqadaryo IIB Transportda xavfsizlikni ta’minlash boshqarmasi navbatchilik qismiga «Qarshi mintaqaviy temiryo‘l uzeli» UK navbatchisi Koson—Sug‘diyona temiryo‘l bekati oralig‘ining 4102-kilometr 9-to‘sig‘ida Buxoro—Qarshi yo‘nalishida harakatlanayotgan yuk poyezdi odam urib yuborgani haqida xabar bergan.

Dastlabki surishtiruvda, jabrlanuvchi Qarshi tumani Yuqori obron mahallasida yashovchi 2003 yilda tug‘ilgan qiz ekani va u og‘ir tan jarohatlari olib, voqea joyida vafot etgani aniqlangan.

Olib borilgan tergovga qadar tekshiruv davomida qiz temiryo‘lning panjaralar bilan to‘silmagan qismidan o‘tayotganda teplovoz old tomoni bilan urib yuborgani ma’lum bo‘lgan.

Qayd etilishicha, hozirda mazkur hodisa yuzasidan tergovga qadar tekshiruv ishlari olib borilmoqda.