2022 yil 16 iyun kuni ijtimoiy tarmoqlarda shifoxonada ayol ikki yoshli bolasini kaltaklagani tasvirlangan video tarqaldi. Keyinroq mazkur hodisa 2022 yil 14 iyun kuni Payariq tumanidagi shifoxonada sodir bo‘lgani aniqlangan.
Payariq tumani «Boshqo‘rg‘on» MFYda yashovchi, 1988 yilda tug‘ilgan ayol 2020 yilda tug‘ilgan farzandini davolatish uchun shifoxonaga olib borib, u yerda stress va asabiy holatda farzandini urgani ma’lum bo‘lgan.
O‘shanda holat yuzasidan Jinoyat kodeksining 110-moddasi (Qiynash) 2-qismi bilan jinoyat ishi qo‘zg‘atilgandi.
Oliy sud matbuot xizmatining xabar berishicha, Jinoyat ishlari bo‘yicha Payariq tumani sudida ikki yoshli farzandini kaltaklagan ayolga hukm o‘qilgan.
Sudda bolaning buvisi kelinini onalik huquqidan mahrum qilib, nabirasini o‘ziga olib berishlarini so‘ragan. Sud hukmiga ko‘ra, ayolga ikki yil muddatga ozodlikni cheklash jazosi tayinlangan.
