Tasmachi mayizlari shiradorligi yuqoriligi bilan xaridorgir hisoblanadi. Hududda qariyb 3 ming gektar tokzor bor. Qishloqdagi xonadonlarning deyarli barchasi mayiz ortidan daromad qiladi.

“Tasmachi qishlog‘imizni yurtga, chet ellarga tanitgan bog‘larimiz, mayizimiz bo‘ladi. 30 yildan beri bog‘dorchilik bilan shug‘ullanamiz. Bog‘larimiz yaxshi: Tasmachi qishlog‘ining tabiati, yeri bog‘ uchun mo‘ljallangan. Mana, hosilimizni yig‘ishtirib olyapmiz, uzumlarni uzib bo‘ldik. Tabiatning injiq kelganligiga qaramasdan, hosil yaxshi. Bog‘imizda uzumning toifi, qora kishmish kabi hosildor, suvga chidamli 6-7 xil navi bor. Bu yil 45-50 darajagacha issiq bo‘ldi. Shunga ham bog‘larimiz chidadi”, — deydi bog‘bon Sirojiddin O‘rozov.

Qishloqdagi uzumchilik fermer xo‘jaliklari aholiga shartnoma asosida 50 sotix, 1 gektardan bog‘ ajratib beradi. Hosil yig‘ilgach, shartnomadan oshgan qismi mayiz qilinadi. Tasmachida katta mayiz bozori ham bor. Haftasiga ikki marotaba bo‘ladigan bozor sentabr oyidan ancha faollashadi.

Yosh bog‘bon Komil Parmonovning ta’kidlashicha, mazkur bozorda bir kunda 170 tonnagacha mayiz sotiladi:  

“1 gektar bog‘im bor. Yiliga 35-40 million so‘m sof daromad qilaman. Uzilgan uzumlar asosan ikki xil, ya’ni ilmaki va yoyma usulda mayiz qilinadi. Yoyma usulda hosil oddiy yerga, bog‘ oralariga yoyib chiqiladi. Ilma usulda esa yog‘ochdan yasalgan maxsus devorlarga osiladi. Ilmaki usulda uzum uzun bo‘lib, cho‘zilib quriydi. Shu sababli, mayizi ham xaridorbop, sifatliroq bo‘ladi. Yoyma mayizning narxi o‘rtacha 15-20 ming so‘m atrofida bo‘lsa, ilma mayiz bundan 10-15 ming so‘m yuqori narxda sotiladi. To‘g‘ri, ilma usulning mehnati ko‘proq, ammo narxida yaxshigina farqi bor”.

Tasmachida tokzorlar yildan yilga ko‘payib boryapti. Xatirchi tumani hokimi o‘rinbosari Jalil Rashidovning ma’lum qilishicha, joriy yildan qishloqda har yili avgust oyida uzum festivali o‘tkazilishi rejalashtirilmoqda.

Ruslan Saburov, Kun.uz muxbiri
Montaj ustasi – Muhiddin Nido.