Xitoy Rossiyadagi harbiy mashg‘ulotlarda ishtirok etadi

«Vostok-2022» mashqlari 30 avgustdan 5 sentabrgacha bo‘lib o‘tadi. Xitoyda ta’kidlanishicha, uning mashg‘ulotlardagi ishtiroki «hozirgi xalqaro va mintaqaviy vaziyat bilan» bog‘liq emas.

Foto: Picture Alliance

Xitoy 30 avgustdan 5 sentabrgacha bo‘lib o‘tadigan «Vostok-2022» strategik harbiy mashg‘ulotlarida ishtirok etish uchun o‘z askarlarini Rossiyaga yuboradi. «Xitoyning ishtiroki qatnashadigan davlatlar o‘rtasida strategik muvofiqlashtirishni kuchaytirish va xavfsizlikka tahdidlarga javob berish qobiliyatini kuchaytirishga qaratilgan», — deb xabar berdi 18 avgust, payshanba kuni XXR Mudofaa vazirligi.

Xabarda qayd etilishicha, «mashqlar joriy xalqaro va mintaqaviy vaziyat bilan bog‘liq emas». «Vostok-2022» mashg‘ulotlarida Xitoy va Rossiyadan tashqari Hindiston, Belarus, Tojikiston va Mo‘g‘uliston harbiy xizmatchilari ishtirok etadi.

G‘arb davlatlari Xitoy va Hindistonni Rossiyaning Ukrainadagi agressiyasi fonida Rossiyaga diplomatik yordam ko‘rsatayotganlikda ayblamoqda. XXR va Hindiston Kremlning harakatlarini qoralashdan bosh tortdi.

May oyida Rossiya va Xitoy Yaponiya hamda Janubiy Koreya yaqinida bombardimonchi samolyotlar ishtirokida qo‘shma mashg‘ulotlar o‘tkazgan edi. O‘shanda AQSh prezidenti Jo Bayden Tokioda bo‘lib, Hindiston, Avstraliya va Yaponiya hukumat rahbarlari bilan mintaqaviy xavfsizlik masalalari yuzasidan uchrashgan.

#Rossiya #Xitoy