Apple Rutube'дан иловада Россия давлат ОАВ контентини яширишни талаб қилди

Жаҳон 08:34 / 16.08.2022 2327

Американинг Apple корпорацияси Rutube видеохостингидан iOS операцион тизими учун иловада РФ давлат ОАВ материалларини яширишни талаб қилди. Бу ҳақда 15 август, душанба куни Rutube матбуот хизматига таяниб, Россия давлат ахборот агентликлари хабар берди

«Apple Rutube иловасини модерация қилиш муаммосини икки йўл билан ҳал қилишни таклиф қилмоқда: иловани фақат россиялик фойдаланувчиларга тақдим этиш ёки «state-sponsored media» контентини олиб ташлаш. Бу Rutube иловаси бошқа давлатлардан бўлган янги фойдаланувчилари учун ишламаслигига олиб келади. Иловани аввалроқ юклаб олган фойдаланувчилар учун, эҳтимол, янгиланишлар мавжуд бўлади», — дея матбуот хизмати жавобидан иқтибос келтирган «Интерфакс». 

Apple қарор қабул қилиш учун икки ҳафта вақт берди, акс ҳолда илова App Store дўконидан ўчириб ташланади. 

Rutube вакиллари Россия давлат ОАВнинг тарқатилишига чеклов қўймоқчи эмасликларини, чунки бу «русзабон аҳоли ҳуқуқларини поймол этишини» маълум қилди. Шу билан бирга, иловадан фойдаланиш имконияти учта давлат билан чекланди. Энди уни фақат Россия, Беларус ва Қозоғистон аҳолиси юклаб олиши мумкин. 

YouTube видеохостингида каналлари блокланган кўплаб рус ОАВ ва блогерлар Rutube’да мавжуд. Улар орасида - «Биринчи канал», «Россия 1», НТВ, «Россия 24», ТНТ, RT, «Спас», шунингдек, телебошловчи Владимир Соловьёв, пранкерлар Вован ва Лексус, блогер Дмитрий (Гоблин) Пучков ва бошқаларнинг каналлари бор. 

Кўпроқ янгиликлар