Бошпанасиз қолган одам қаерга мурожаат қилиши керак? Унга қандай ёрдам берилади?

Жамият 18:51 / 15.08.2022 6571

Ўзбекистонда бошпанасиз одамларга қандай ёрдам берилади? Ушбу мақолада Тошкент шаҳри мисолида шу ҳақда маълумот берамиз. Таъкидлаш лозим, бошқа айрим ҳудудларда ҳам деярли шундай тартиб ўрнатилган.

Тошкентнинг Яшнабод туманида муайян яшаш жойига эга бўлмаган шахсларни ребилитация қилиш маркази, яъни “Меҳр-саховат уйи” 2018 йилда очилган. 200 кишига мўлжалланган бу масканда ҳозир 100 дан ортиқ бошпанасиз одамлар яшайди.

“Меҳр-саховат уйи”га кимлар қабул қилинади?

“Мехр саховат” уйига 18 ёшдан юқори бўлган, муайян яшаш жойига эга бўлмаган, яқин қариндошлари бўлмаган шахслар қабул қилинади.

Кимга мурожаат қилиш керак?

Бошпанасиз инсонлар “Меҳр-саховат уйи”га турли йўллар орқали келиб қолишади. Аксарият ҳолларда улар ички ишлар ходимлари томонидан ёки волонтёрларнинг хабарлари асосида топилади.

Шунингдек, уйи, боришга жойи бўлмаган фуқароларнинг ўзлари ҳам “102”га қўнғироқ қилишлари ёки ҳудудий инспекторларга мурожаат қилиб марказга олиб келиниши мумкин. Бундан ташқари, саховат уйи 24/7 режимда ишлагани учун одамлар истаган вақтида у ерга ўзлари боришлари ҳам мумкин.

Маълумотлар базаси ёрдамида фуқаронинг шахси аниқлаштирилади. Ҳақиқатан ҳам бошпанасиз қолган, яшашга бошқа жойи йўқ, қариндош-уруғлари ҳам йўқ бўлса, “Меҳр-саховат уйи”га жойлаштирилади.

Марказ қандай ёрдам беради?

Муайян яшаш жойига эга бўлмаган шахслар реабилитация марказига қабул қилингач, дастлаб уларнинг фотосуратлари ва бармоқ излари олиниб, тиббий ва шахсий кўрикдан ўтказилади ва уларга кийим-кечаклар берилади.

Кийим-кечакдан ташқари, яшовчиларга ҳар куни 3 маҳал овқат, базавий дори-дармонлар ҳам берилади. Қолаверса, паспорт ёки пенсия ҳужжатлари бўлмаганларга ҳужжатлар тикланишида амалий ёрдам ҳам кўрсатилади. Улар кейинчалик иш билан ҳам таъминланади.

Маълум қилинишича, шу вақтгача паспорти тиклаб берилган жами фуқаролар сони 1 064 нафарни, ишга жойлаштирилганлари 824 нафарни, нафақа расмийлаштириб берилганлари эса 58 нафарни ташкил этади.

ИИББ Ахборот хизмати раҳбари Нилуфар Мадиеванинг маълумотига кўра, ҳозирда саховат уйини кенгайтириш бўйича ҳам ишлар олиб бориляпти, келгусида ҳозирги марказнинг ёнига яна битта бино қурилиши режалаштирилган.

Кўпроқ янгиликлар