“Ixtirochilik va ratsionalizatorlik faoliyatini qo‘llab-quvvatlash chora-tadbirlari to‘g‘risida”gi hukumat qarori qabul qilindi.

O‘zbekiston Ixtirochilar va ratsionalizatorlar jamiyati nodavlat notijorat tashkiloti tashkil qilinadi. Respublika iqtisodiyoti barcha tarmoqlarida ixtirochilik faoliyatini rivojlantirish jamiyat asosiy vazifalaridan hisoblanadi.

2022 yildan har yili hududlar, tarmoqlar va sohalar kesimida ixtirochilik va ratsionalizatorlik bo‘yicha ko‘rik-tanlov o‘tkaziladi. Ko‘rik-tanlov g‘oliblariga quyidagi miqdorda pul mukofotlari beriladi: 1-o‘ringa – 90 mln so‘m; 2-o‘ringa – 75 mln so‘m; 3-o‘ringa – 60 mln so‘m.

Mablag‘lar Ilm-fanni moliyalashtirish va innovatsiyalarni qo‘llab-quvvatlash jamg‘armasi hisobidan qoplanadi. Ko‘rik-tanlovlarda g‘oliblarning ixtirolarini kelgusida startap loyihalar doirasida moliyalashtirishga ustuvorlik beriladi. G‘oliblar magistratura mutaxassisligiga Yoshlarga oid davlat siyosatini qo‘llab-quvvatlash jamg‘armasi granti hisobidan imtihonsiz qabul qilinadi.