Шахмат олимпиадаси чемпионларига пул мукофотлари топширилди

Спорт 21:43 / 12.08.2022 25909

Ҳиндистоннинг Ченнай шаҳрида ўтган 44-Бутунжаҳон шахмат олимпиадаси чемпиони бўлган Ўзбекистон терма жамоаси аъзоларига пул мукофотлари топширилди.

Мукофот нақд шаклда, 200 минг сўмлик янги купюраларда топширилди. Тақдирлаш тадбири Спорт вазирлиги биносида бўлиб ўтган.

Фото: Спортни ривожлантириш вазирлиги матбуот хизмати

Вазирлик матбуот хизмати хабарига кўра, тадбирда спорт вазири ўринбосари М.Исмоилов, Ёшлар ишлари агентлиги директори, шахмат федерацияси раиси А.Саъдуллаев, федерация раисининг биринчи ўринбосари Х.Турдалиев ҳамда чемпион шахматчилар – Нодирбек Ёқуббоев, Нодирбек Абдусатторов, Жавоҳир Синдоров, Шамсиддин Воҳидов ва Жаҳонгир Воҳидов ҳамда уларнинг ота-оналари иштирок этган.

Фото: Спортни ривожлантириш вазирлиги матбуот хизмати

Эслатиб ўтамиз, Ўзбекистон эркаклар терма жамоаси шахмат олимпиадасида бирор турда мағлубиятга учрамаган жамоа бўлди.

Жамоа аъзолари президент фармони билан “Ўзбекистон ифтихори” фахрий унвони билан тақдирланди. Уларга президент совғаси сифатида Equinox автомобиллари топширилди.

Фото: Спортни ривожлантириш вазирлиги матбуот хизмати

Мусобақада 162 та жамоа орасида 31-ўринни эгаллаган Ўзбекистон аёллар терма жамоаси аъзолари эса “Келажак бунёдкори” медали билан мукофотланди.

Маълумот учун, 2026 йилда бўладиган 46-Бутунжаҳон шахмат олимпиадасига Ўзбекистон мезбонлик қилади.

Кўпроқ янгиликлар