Ukrainalik grossmeyster g‘irromligi uchun 3 yilga diskvalifikatsiya qilindi

Xalqaro shaxmat federatsiyasi (FIDE) Ruminiya terma jamoasida 2023 yildan buyon o‘ynab kelayotgan ukrainalik grossmeyster Kirill Shevchenkoni g‘irromligi uchun uch yilga (1 yili shartli) diskvalifikatsiya qildi.

2024 yil oktyabrida Shevchenko Ispaniya jamoaviy chempionatidan chetlatildi va unga ikkita mag‘lubiyat yozildi. Shubhalar grossmeysterning hojatxonaga tez-tez borib turishi sababli paydo bo‘ldi. U yerda ikki marta mobil telefonlar topildi, ulardan birida ukrainalikning dastxati bor edi. Shaxmatchining o‘zi avvaliga barcha ayblovlarni rad etdi, biroq keyinroq telefondan foydalanganini tan oldi.

FIDE axloq va intizom bo‘yicha komissiyasi (EDC) qarorida Shevchenkoning telefonni hojatxonaga yashirib, Lichess platformasiga kirish uchun foydalangani qayd etilgan. Shu bilan birga, shaxmatchi g‘irromlik qilganini yoki harakatlari o‘yinlarga ta’sir qilganini rad etadi. Jazoni yengillashtiradigan omillar sifatida Shevchenko huquqbuzarlikni o‘z vaqtida tan olgani, pushaymon ekani va o‘ldirish tahdidi tufayli ruhiy holati yomonligi ko‘rsatilgan.

Shevchenko Ukraina chempionatlari sovrindori va Ukraina terma jamoasi tarkibida 2021 yilgi Yevropa jamoaviy chempionati g‘olibi.