Вазир: “Ўзбекистон 2026 йилда ТОП-50 инновацион давлатлар қаторига кириши мақсад қилинган”

Ўзбекистон 20:31 / 05.08.2022 3931

Бугун, 5 август куни 2022-2026 йилларда Ўзбекистоннинг инновацион ривожланиш стратегиясига бағишланган матбуот анжумани ўтказилди. Унда инновацион ривожланиш вазири Иброҳим Абдураҳмонов тақдим этилаётган стратегия бўйича бажариладиган ишлар ҳақида маълумот берди.

Тадбирда айтилишича, ишлаб чиқилган янги стратегияда Ўзбекистон 2026 йилда ТОП-50 инновацион давлатлар қаторидан жой эгаллаши асосий мақсад этиб белгиланган. Шунингдек, ҳудудларда 224 та, тармоқларда 441 та, олийгоҳлар ва илмий ташкилотларда 1 086 та лойиҳани амалга ошириш режалаштирилган.

Вазир ҳозирга қадар бажарилган ишларга ҳам тўхталди. Унга кўра, ҳозир тармоқ ва олийгоҳ/илмий ташкилотлар кесимида жами 1 751 та инновацион лойиҳа шакллантирилган. Ҳудудлар кесимида 2 507 та иш ўрни яратиладиган 206 млрд сўмлик 224та лойиҳа амалга оширилмоқда.

Тармоқлар кесимида илмий-инновацион маҳсулотлар ишлаб чиқарилиши белгиланган 26 та тармоқ ташкилотининг 6,6 трлн сўмлик 265 та лойиҳаси; иқтисодиёт тармоқларида амалга ошириладиган 33 трлн сўмлик 176 турдаги инновацион маҳсулотларни сериялаб ишлаб чиқариш ва технологиялар ўзлаштирилиши назарда тутилган “драйвер” лойиҳалар шакллантирилгани айтилди.

Эслатиб ўтамиз, Ўзбекистоннинг инновацион ривожланиш бўйича 5 йиллик стратегияси ўтган ойда президент фармони билан тасдиқланди.

Кўпроқ янгиликлар