Оилавий болалар уйини ташкил этганларга бюджетдан пул ажратилади

Ўзбекистон 11:30 / 05.08.2022 6908

“Оилавий болалар уйлари фаолиятини такомиллаштиришга оид қўшимча чора-тадбирлар тўғрисида”ги президент қарори қабул қилинди.

1 сентябрдан:

  • оилавий болалар уйлари етим болалар ва ота-она қарамоғидан маҳрум бўлган болаларни (тарбияланувчилар) оилага тарбияга олишни истаган фуқаролар томонидан юридик шахс мақомисиз тегишли туман (шаҳар) ҳокими қарори асосида ташкил этилади;
  • оилавий болалар уйидаги тарбияланувчилар сони камида 3 нафарни, лекин кўпи билан 5 нафарни ташкил қилиши лозим. Бунда, оилавий болалар уйини ташкил қилган фуқаролар ўз фарзандлари ҳамда тарбияланувчилар умумий сони 8 нафардан ошмаслиги керак;
  • оилавий болалар уйларини тутинган ота-оналарни тайёрлаш курсларини муваффақиятли тугатган фуқаролар томонидан ташкил қилишга рухсат этилади;
  • оилавий болалар уйлари фаолиятини мувофиқлаштириш ва назорат қилиш Миллий гвардия ҳамда туман (шаҳар) ҳокимликлари болаларни ҳимоя қилиш шуъбалари томонидан амалга оширилади;
  • оилавий болалар уйини ташкил этиш тўғрисидаги ариза билан мурожаат қилган шахслардан тегишли вазирлик ва идоралар электрон маълумотлар базаларидан олиш мумкин бўлган ҳужжатларни талаб қилиш ман этилади.

1 сентябрдан оилавий болалар уйини ташкил этган фуқароларга ҳар ойда давлат бюджетидан:

  • оилавий болалар уйидаги ҳар бир тарбияланувчи яшаш харажатлари учун 7 ёшгача бўлган тарбияланувчиларга 1,5 млн сўм, 8 ёшдан 18 ёшгача тарбияланувчиларга 2,1 млн сўм;
  • оилавий болалар уйидаги ҳар бир тарбияланувчини парвариш қилиш учун 920 минг сўм, ногиронлиги бўлган болалар учун 1 млн 380 минг сўм;
  • оилавий болалар уйига тарбияга олинган ҳар бир ногиронлиги бўлган болани даволаш-соғломлаштириш учун ҳар ойда 300 минг сўм миқдорида маблағ ажратилади;
  • оилавий болалар уйидаги тарбияланувчилар яшаш харажатлари учун ажратилган маблағлар ҳар ой 5-санасига қадар тутинган ота-она номига очилган банк пластик картасига ўтказиб берилади;
  • оилавий болалар уйидаги тарбияланувчиларга ҳудудда жойлашган давлат спорт мажмуалари, маънавий-маърифий масканлар, тўгараклар, от спорти секциялари, “Ишга марҳамат” мономарказлари ва бошқа ўқув марказларидаги тўгараклар ва курсларга бепул қатнашиш ҳуқуқи берилади.

Оилавий болалар уйидаги тарбияланувчилар учун:

  • Касаба уюшмалари федерацияси томонидан йилига бир маротаба соғломлаштириш оромгоҳларида дам олиш учун бепул йўлланмалар ажратилади;
  • туман (шаҳар) ҳокимликлари томонидан бир йилда икки маротаба республика тарихий шаҳарларига бепул саёҳатлар ҳамда театр томошалари ва концерт дастурлари ташкил этилади;
  • оилавий болалар уйидаги тарбияланувчилар давлат даволаш-профилактика муассасалари томонидан бир йилда икки маротаба бепул тўлиқ тиббий текширувдан ўтказилади;
  • оилавий болалар уйидаги тарбияланувчиларга соғломлаштириш оромгоҳига ва саёҳатга бориш, театр томошалари ва концертларда қатнашишга оид имтиёзлар оилавий болалар уйини ташкил этган фуқаролар ўз фарзандларига ҳам татбиқ этилади.
Кўпроқ янгиликлар