IfW: Украинадан миллионлаб тонна донни кемаларда олиб чиқиб кетиш қийин

Жаҳон 17:51 / 05.08.2022 6113

Украинадан миллионлаб тонна донни кемаларда олиб чиқиб кетиш қийин, дейди Киль жаҳон иқтисодиёти институти (IfW) экспертлари. Украинада сақланаётган 20 миллион тонна ўтган йилги ҳосилдан бўлган донни экспорт қилиш учун 570 тага яқин кема жўнатиш керак, дейди улар. «Ҳозир ғалла ўрим-йиғими қайта бошланмоқда, уни сақлаш учун зудлик билан омборхоналар керак, шунинг учун поездлар ва юк автотранспорти каби бошқа транспорт имкониятларидан тўлиқ фойдаланиш керак», дея маълум қилди IfW Киль савдо индикатори раҳбари Винсент Штамер 5 август, жума куни. 

22 июль куни Истанбулда БМТ ва Туркия воситачилигида РФ ҳамда Украина ўртасида келишув имзоланган бўлиб, унинг мақсади Украина портлари блокадасини тугатишдир. Тахминларга кўра, экспорт Украинанинг учта порти - Одесса, Чорноморск ва Южнийдан амалга оширилади. Келишув тузилганидан бир кун ўтиб, 23 июль куни Одесса порти Россия томонидан ракета зарбаларига учради. 

1 август куни Украина дони бўлган биринчи юк кемаси Одесса портидан жўнаб кетди, икки кундан сўнг у Истанбулда текширилди ва Ливанга йўл олди. 5 август куни Туркия Мудофаа вазирлиги Украина дони бўлган яна учта кема денгизга йўл олгани ҳақида хабар берди – Чорноморскда жойлашган Polarnet ва Rojen юк кемалари мос равишда Қорасув (Туркия) ва Британиянинг Тизпортига йўл олди, Navistar эса Одесса портини Ирландия учун мўлжалланган маккажўхори билан тарк этди. Бу кемалар бортида жами 58 минг тоннадан ортиқ маккажўхори бор. 

Украина расмийларига кўра, ўтган йилги ҳосилнинг 20 миллион тоннадан ортиғи ҳали ҳам экспортга чиқарилиши лозим. Россиянинг Украинага бостириб кириши натижасида Украина Қора денгиз портларининг блокадаси юзага келгани сабабли бу имконсиз бўлиб қолди. 

Кўпроқ янгиликлар