Бир мавсумда 30 млн сўм даромад — ёғоч даста ясовчи маҳалла

Жамият 23:36 / 05.08.2022 8635

Атрофдаги туманлардан олиб келинган тол, терак, қайрағоч, заранг ёғочларига ишлов берилади. Ишлов берилган ёғочлар даста ҳолатига келтирилади.

Асосан кетмон ва болтага даста тайёрланади. Маҳсулот маҳаллий бозорга чиқарилади.

“Шу иш билан 15 йилдан бери шуғулланамиз. 8 нафар ишчимиз бор. Битта ишчимиз яхши ишласа, 200-250 минг сўмгача даромад топади. Оилавий, дадам иккаламиз шу иш билан шуғулланамиз”, – дейди ҳунарманд-тадбиркор Миносиддин Маматисаев.

Маҳалла кўчалари ёғочлар билан тўлган. Мавсум давомида иш қизғин давом этади. Ёғочга ишлов бериш жараёнида чиққан чиқиндининг ҳам харидорлари бор. Уларни қишда ёқиш учун олиб кетишади.

“4-5 та одам ишлайди. Бир кунда 200-250 та даста ишлаб чиқарамиз. Буниям ўзига яраша қийинчилиги бор. Кўринишидан енгилга ўхшагани билан, дарахт кесиб келинади, юкланади, арраланади, аррадан ўтказилади. Битта дастанинг келиб тушиши бизга 4-4,5 минг сўм бўлади. Донасидан 1,5-2 минг сўмдан қолади. Битта даста ҳозирда 6 минг сўмдан сотиляпти. Қанча кўп ишлаб чиқарсак, шунча кўп фойда қолади”, – дейди ёш ҳунарманд Ортиқмирзо Раҳмонов.

Бир мавсумда ўртача 30 миллион сўм даромад топилмоқда. Ушбу маҳаллада ишсизлар деярли йўқ ва улар мана шу ҳунар ортидан рўзғор тебратмоқда.

Абдували Қурбонов,
Kun.uz мухбири
Тасвирчи ва монтаж устаси – Азизбек Исмоилов.

Кўпроқ янгиликлар