Davlat soliq qo‘mitasi 1 iyuldan soliq ma’murchiligida kutilayotgan o‘zgarishlar ro‘yxatini taqdim etdi.

Kasanachilikka imtiyoz va subsidiyalar

2025 yil 1 iyuldan 1 yanvarga qadar kasanachilarga jismoniy shaxslardan olinadigan daromad solig‘i kasanachilikdan olinadigan jami daromadni 50 foizga, biroq 1 oyda ko‘pi bilan 1 mln so‘mgacha kamaytirgan holda hisoblanadi;

Kasanachilar ijtimoiy soliq to‘lovini o‘zini o‘zi band qilgan shaxslar uchun belgilangan tartibda amalga oshiradi. Ya’ni bazaviy hisoblash miqdori bir barobari miqdorida ijtimoiy soliq to‘lanadi – 2022 yil 1 iyunidan boshlab BHM miqdori 300 ming so‘m etib belgilangan.   

Jamoat ishlari jamg‘armasi mablag‘lari hisobidan olis va chekka hududlardagi mahallalarda kasanachilikni tashkil etgan tadbirkorlik sub’yektlariga har bir kasanachi dastlabki uch oy davomidagi kasanachilik faoliyati uchun bir oylik o‘rtacha daromadi miqdorida bir martalik subsidiya ajratiladi. Subsidiya oluvchi hududlar ro‘yxatiga 252 mahalla fuqarolar yig‘inlari kiritilgan.

Ommaviy axborot vositalari uchun soliq kamaytiriladi

Prezident “Ommaviy axborot vositalarini qo‘llab-quvvatlash va jurnalistika sohasini rivojlantirish chora-tadbirlari to‘g‘risida”gi qarorni imzoladi. Unga ko‘ra:

• ommaviy axborot vositalari foyda solig‘ini belgilangan soliq stavkalariga nisbatan 50 foiz kamaytirilgan soliq stavkalari bo‘yicha to‘laydi, reklama xususiyatiga ega bo‘lgan ommaviy axborot vositalari bundan mustasno;
• O‘zbekistonda ishlab chiqarilmaydigan, belgilangan tartibda shakllantiriladigan ro‘yxat bo‘yicha olib kiriladigan matbaa uskunalari, zamonaviy foto va radiotelevizion uskunalar hamda qog‘oz bojxona bojidan ozod etiladi.

Turizm mahallariga soliq imtiyozlari kuchga kiradi

Prezidentning “Xizmatlar sohasini rivojlantirishga oid qo‘shimcha chora-tadbirlar” to‘g‘risidagi qaroriga muvofiq, “Turizm mahallasi”, “Turizm qishlog‘i” yoki “Turizm ovuli” maqomi berilgan fuqarolar yig‘inlari hududlarida mehmon uylari, ovqatlanish, ko‘ngilochar joylar tashkil etgan tadbirkorlar uchun quyidagi imtiyozlar qo‘llaniladi:

- aylanmadan olinadigan soliq va ijtimoiy soliq stavkasini 1 foiz miqdorida belgilanadi;

- hududlardagi obektlar va ular egallagan yer uchastkasi bo‘yicha yuridik shaxslar mol-mulk va yer solig‘i — mazkur soliqlar bo‘yicha hisoblangan summa 1 foizi miqdorida belgilanadi;

Elektron savdo bilan shug‘ullanuvchilarga foyda va aylanmadan olinadigan soliq kamaytirilgan stavkasi qo‘llaniladi

Tovarlar (ishlar, xizmatlar) elektron savdosini amalga oshiruvchi barcha soliq to‘lovchilar foyda solig‘i stavkasini 7,5 foiz va aylanmadan olinadigan soliq stavkasini 2 foiz miqdorida qo‘llash huquqiga ega (ilgari faqat elektron tijorat sub’yektlari milliy reyestriga kiritilgan soliq to‘lovchilar uchun bo‘lgan).

Qimmatli qog‘ozlarga doir bitimlarga nisbatan yangi tartib kuchga kiradi

Qimmatli qog‘ozlar birjadan tashqari uyushgan savdosida qimmatli qog‘ozlarga doir bitimlar tuzilganda sotuvchi (emitent bundan mustasno) tomonidan foyda solig‘i va daromad solig‘i o‘rniga bitim summasi 0,3 foizi miqdorida yig‘im to‘lanadi.

Soliq to‘lovchilar ayrim toifalari uchun soliq va bojxona imtiyozlari bosqichma-bosqich bekor qilinadi

Bekor qilinishi ko‘zda tutilgan soliq va bojxona imtiyozlarining to‘liq ro‘yxati bu yerda.

Bojxona bojlari bo‘yicha imtiyozlar faqatgina O‘zbekiston qonunlari bilan beriladi. Bunda, Tarif va notarif tartibga solish kengashi xulosasi olinishi majburiyligi kuchga kirdi.

Tarmoq vazirlik va idoralari, mahalliy davlat hokimiyati organlari rahbarlari sohani va (yoki) hududni rivojlantirish uchun berilgan alohida soliq va bojxona imtiyozlari samaradorligi to‘g‘risidagi hisobotlarni yil yakunlari bo‘yicha har yili 1 martga qadar Moliya vazirligi va Davlat soliq qo‘mitasiga taqdim etib boradi.

Foydalanilmayotgan ko‘chmas mulk obektlariga nisbatan oshirilgan soliq stavkalari qo‘llanilmaydi

Bo‘sh turgan binolar, foydalanilmayotgan ishlab chiqarish maydonlari, yashash uchun mo‘ljallanmagan inshootlar, tugallanmagan qurilish obektlari hamda ushbu obektlar bilan band bo‘lgan yer uchastkalariga nisbatan mol-mulk va yer soliqlari oshirilgan stavkalari qo‘llanilmaydi, soliq imtiyozlari va preferensiyalar amal qilishini to‘xtatish bekor qilinadi.

Majburiy QQS to‘lovchisi sifatida e’tirof etiladigan tadbirkorlik sub’yektlariga QQS guvohnomasi avtomatik ravishda beriladi

Majburiy ravishda QQS to‘lovchisi sifatida e’tirof etiladigan tadbirkorlik sub’yektlariga QQS guvohnomasi soliq xavfi darajasiga aniqlik kiritilmasdan avtomatik ravishda beriladi.

Soliq organlari monitoringi davomida tadbirkorlik sub’yektlari faoliyatida soliq xavfi holatlari aniqlanishi QQS guvohnomasi amal qilishini to‘xtatib qo‘yishga asos bo‘ladi.

Yuqori xavf darajasi aniqlangan tadbirkorlar QQS guvohnomasini to‘xtatib qo‘yishdan 5 kun oldin xabardor etish tartibi joriy etiladi. Ushbu muddatda kamchiliklarni bartaraf etish imkoniyati beriladi. Belgilangan muddatda kamchiliklar bartaraf etilmasa, QQS guvohnomasi to‘xtatib turiladi (Amalga oshirilayotgan bitimlar (operatsiyalar) xarid qilinayotgan va realizatsiya qilinayotgan tovarlar (xizmatlar) nomenklaturasiga nomuvofiq bo‘lishi yoki soliq to‘lovchi davlat ro‘yxatidan o‘tkazilgan manzilda mavjud bo‘lmaganlik holatlari bundan mustasno).

2023 yil 1 martga qadar tovarlar (xizmatlar) identifikatsiya kodlari (MXIK)ni noto‘g‘ri aks ettirganlik uchun moliyaviy jarima qo‘llanilmaydi.

2023 yil 1 martga qadar operatsiyalarni “E-aktiv” AATda aks ettirish ixtiyoriy hisoblanadi.