Qashqadaryo viloyati IIb axborot xizmatining xabar berishicha, 2022 yil 13 iyun kuni viloyat IIB hamda prokuratura departamenti xodimlari hamkorligida tezkor tadbir o‘tkazilgan.

Tadbirda Koson tumani Po‘lati mahallasida yashovchi shaxs uch nafar fuqaroni “O‘zbekiston temir yo‘llari” tizimidagi Qarshi mintaqaviy temiryo‘llari uzeliga shu yerda ishlovchi tanishlari orqali ishga kiritishini aytib, ularning har biridan 2100 dollardan, jami 6,3 ming dollar talab qilib, pullarni bank plastik kartasiga tushirib olgan paytda ashyoviy dalillar bilan ushlangan.

Qayd etilishicha, holat yuzasidan Jinoyat kodeksining 168-moddasi 2-qismi “a” bandi bilan jinoyat ishi qo‘zg‘atilib, hozirda tergov harakatlari olib borilmoqda.

Avvalroq, Muborak tumani tibbiyot birlashmasi xodimlar bo‘limi inspektori fuqaroni tibbiyot birlashmasi mansabdor shaxslari orqali navbatchi hamshira vazifasiga ishga kiritib qo‘yish evaziga 500 dollar hamda uning shaxsiga oid hujjatlarini olgan vaqtida ashyoviy dalillar bilan ushlangandi.