Nogironligi bo‘lgan yoshlarning repetitor xarajatlari qoplab beriladi

“Huquqiy axborot” kanali xabariga ko‘ra, nogiron yoshlarga nodavlat ta’lim tashkilotlarida kasb-hunar, dasturlash, umumta’lim fanlari va xorijiy tillarni o‘rgatish, zarur hollarda yashash va transport xarajatlarini qoplash uchun bazaviy hisoblash miqdori 50 baravarigacha (15 mln so‘mgacha) subsidiya ajratiladi.

Subsidiya olish uchun istalgan davlat xizmatlari markaziga murojaat qilinadi yoki YaIDXP orqali davlat xizmatidan elektron tarzda foydalanish uchun ro‘yxatdan o‘tiladi.

Arizaga quyidagilar ilova qilinadi:

o‘qish xarajatlari uchun subsidiya olishda:

• ariza bola qonuniy vakili tomonidan berilsa, uning shaxsiy identifikatsiya raqami va bola qonuniy vakili ekanini tasdiqlovchi hujjat;
• nodavlat ta’lim tashkiloti tomonidan ariza beruvchini o‘qitish to‘g‘risida shartnoma elektron nusxasi;
• yashash va transport xarajatlari uchun subsidiya olishda:
• yo‘l xarajatlarini tasdiqlovchi hujjatlar elektron nusxalari;
• ijara shartnomasi va uning soliq organlarida hisobga qo‘yilgani haqidagi bildirishnoma elektron nusxasi.

Davlat xizmati bepul ko‘rsatiladi. Ariza 3 ish kunida ko‘rib chiqilib:

• subsidiya ajratish haqida elektron tizimga ma’lumot kiritiladi va bu haqida ariza beruvchiga SMS-xabarnoma yuboriladi;
• nodavlat ta’lim tashkiloti joylashgan hududdagi mahalla yoshlar yetakchisi zimmasiga ariza beruvchi nodavlat ta’lim tashkilotida o‘qishini joyiga chiqqan holda monitoring qilish vazifasi yuklatiladi.

Davlat xizmatlarini ko‘rsatish jarayonida ariza beruvchilarga oid ma’lumotlar sir saqlanadi.

Nogironligi bo‘lgan yoshlarga asbob-uskunalar va mehnat qurollarini xarid qilish uchun subsidiya ajratishning ma’muriy reglamenti ham tasdiqlandi.