«O‘zbekistonda xizmat ko‘rsatgan ekolog» faxriy unvoni ta’sis etiladi

Qonun loyihasi 6 moddadan iborat. Unda “O‘zbekistonda xizmat ko‘rsatgan ekolog” faxriy unvoni ekologiya va atrof-muhitni muhofaza qilish sohasini rivojlantirish, ekologik nazoratni amalga oshirish, ekologik jihatdan toza va innovatsion texnologiyalarni ishlab chiqish hamda amaliyotga tatbiq etish borasida xizmatlari uchun tajribali mutaxassislariga berilishi nazarda tutilgan.

Bundan tashqari, unvon chiqindilarni qayta ishlashni tashkil etish, o‘simlik va hayvonot dunyosini qayta tiklash hamda ko‘paytirish, o‘rmonlar, muhofaza etiladigan hududlar va yashil hududlarni tashkil etish va saqlash, ekologiya va atrof-muhitni muhofaza qilish sohasida ilmiy-tadqiqot ishlarini amalga oshirish, kadrlar tayyorlash, qayta tayyorlash va malakasini oshirish borasida katta xizmatlari uchun ekologiya va atrof-muhitni muhofaza qilish hamda o‘rmon xo‘jaligi organlari, sanoat korxonalari, tadbirkorlik sub’yektlari yuqori malakali xodimlariga, inspektorlariga, qo‘riqchilariga, muhandislarga hamda ilmiy-tadqiqot va ta’lim muassasalari tajribali mutaxassislariga beriladi.

Bildirilishicha, “O‘zbekistonda xizmat ko‘rsatgan ekolog” faxriy unvonini ta’sis etish to‘g‘risida”gi qonun loyihasi qabul qilinishi ekologiya va atrof-muhitni muhofaza qilish masalalari sohasida faoliyat yuritayotgan xodimlar faoliyatini rag‘batlantirishga huquqiy asos yaratadi, tarmoq nufuzini oshirishga xizmat qiladi.