Adliya vazirligi tizimidagi Yuridik xizmat ko‘rsatish markazlari tomonidan respublikadagi 9 ming 758ta umumiy o‘rta ta’lim maktablaridagi kadrlar xizmati xodimlariga oylik maosh to‘lash amaliyoti o‘rganib chiqilgan.

O‘rganishda 9 ming 787ta kadrlar xizmati xodimlari shtat birliklarida ishlayotgan 9 ming 937 nafar (0,5 stavka ham qo‘shib hisoblaganda) xodimlar maoshlari qamrab olingan bo‘lib, ularning 911 nafari oliy ma’lumotli, 9 ming 26 nafari oliy ma’lumotga ega bo‘lmagan mutaxassislar ekani aniqlangan.

Vazirlar Mahkamasining 2019 yil 6 sentyabrdagi 743-son qaroriga ko‘ra, davlat budjeti mablag‘lari hisobiga saqlanadigan tashkilotlarda oliy ma’lumotli xodimlarning lavozim razryadlari – 7-razryad, oliy ma’lumotli bo‘lmagan xodimlarning lavozim razryadlari – 6-razryad etib belgilangan bo‘lsa-da, o‘rganish davomida aksariyat tuman va shahar xalq ta’limi bo‘limlari tomonidan maktablardagi kadrlar bo‘limi xodimlarining mehnatga haq to‘lash bo‘yicha lavozim razryadlari past belgilangani ma’lum bo‘lgan.

Xususan, 160ta holatda 2-razryad, 1 ming 353ta holatda 3-razryad, 48ta holatda 4-razryad, 4 mingta holatda 5-razryad, 4 ming 160ta holatda 6-razryad va 216ta holatda 7-razryad etib belgilangan.

Xodimlarning mehnatga haq to‘lash bo‘yicha lavozim razryadlari asossiz pasaytirilishi natijasida jami 16 mlrd so‘mga oylik maoshlar kam to‘langan.

Qo‘shimcha qilinishicha, hozirgacha adliya bo‘limlari tomonidan ko‘rilgan choralar natijasida 3 mlrd so‘m to‘lab berilgan va qolgan qismini ham undirish choralari ko‘rilmoqda.

«Qonunchilikka zid ravishda kam ish haqi to‘lash holatlari yuzasidan hududiy adliya organlari tomonidan 1 ming 832ta ta’sir choralari kiritilib, unga ko‘ra 6 ming 38 nafar xodimning lavozim razryadini muvofiqlashtirish so‘ralgan.

Hozirda hududiy adliya organlari tomonidan sudlarga tegishli da’vo arizalari kiritilib, kam hisoblangan oylik maoshlarini to‘latib berish choralari ko‘rilmoqda», – deyiladi vazirlik xabarida.

Ma’lumot uchun, 2021 yil 1 oktyabrdan respublikaning barcha hududida Adliya vazirligi tizimida Yuridik xizmat ko‘rsatish markazlari tashkil etilgan bo‘lib, markazlar tuman (shahar) miqyosidagi davlat tashkilotlariga yuridik xizmat ko‘rsatish bilan shug‘ullanib kelmoqda.