Уй қуриш учун ер участкалари мулк ҳуқуқи асосида аукцион орқали реализация қилинади

Ўзбекистон 07:43 / 28.01.2022 9151

Вазирлар Маҳкамасининг “Қишлоқ хўжалигига мўлжалланмаган ер участкаларни хусусийлаштириш тўғрисида”ги қонунни амалга ошириш чора тадбирлари тўғрисида”ги қарори лойиҳаси эълон қилинди.

Ишлаб чиқилган қарор лойиҳаси билан қуйидагилар тасдиқланмоқда:

  • юридик ва жисмоний шахсларга доимий фойдаланиш (эгалик қилиш), ижара ва мерос қилиб қолдириладиган умрбод эгалик қилиш ҳуқуқи асосида тегишли бўлган ер участкаларини хусусийлаштириш бўйича давлат хизматларини кўрсатишнинг маъмурий регламенти;
  • тадбиркорлик ва шаҳарсозлик фаолиятини амалга ошириш учун ер участкаларини мулк ҳуқуқи ва ижара ҳуқуқи асосида электрон онлайн-аукцион орқали реализация қилиш тартиби тўғрисидаги низом;
  • якка тартибда уй-жой қуриш учун ер участкаларини мулк ҳуқуқи асосида электрон-онлайн аукцион орқали реализация қилиш тартиби тўғрисидаги низом.

“Ерхусусийлаштириш” ААТ ер участкаларини хусусийлаштириш бўйича давлат хизматларини кўрсатиш жараёнига Давлат кадастрлари палатасининг ҳудудий бўлинмалари, туманлар ва шаҳарлар қурилиш бўлимлари, туман ва шаҳар ҳокимликлари, шунингдек, Давлат активларини бошқариш агентлигининг ҳудудий бошқармалари уланиши назарда тутилган.

Хусусийлаштирилган ер участкасини сотиб олиш қиймати Вазирлар Маҳкамаси томонидан хусусийлаштириш кунида тегишли ер участкалари учун белгиланган юридик ва жисмоний шахслар учун ер солиғи ставкасининг ўн бараварида белгилаш кўзда тутилмоқда.

Бўш турган ер участкаларини мулк ҳуқуқи ва ижара ҳуқуқи асосида электрон онлайн-аукцион орқали реализация қилиш тўғрисидаги низом бўш турган ер участкалари бўйича кадастр йиғмажилдларни тайёрлаш туманлар (шаҳарлар) ҳокимликларининг буюртманомалари асосида туман (шаҳар) қурилиш бошқармаларининг мурожаатларига биноан амалга оширилишини назарда тутмоқда.

Онлайн-аукцион савдосига қўйилган бўш турган ер участкасининг бошланғич баҳоси Давлат активларини бошқариш агентлигининг ҳудудий бошқармаси буюртманомасига асосан мустақил баҳоловчи ташкилот томонидан белгиланади.

Қишлоқ хўжалигига мўлжалланмаган ер участкаларини хусусийлаштириш, ушбу ер участкаларини ижарага олиш ҳуқуқини электрон онлайн-аукцион орқали реализация қилишдан тушган маблағлар, тегишли харажатлар чегириб ташлангандан кейин давлат бюджетига кейинчалик мақсадли фойдаланиш билан ҳудудий ривожлантириш ва тегишли ҳудуддаги аҳоли пунктларининг бош режалари ва уларни ривожлантириш ва қуриш тўғрисидаги бошқа шаҳарсозлик ҳужжатларини ишлаб чиқиш ҳамда инфраструктурани ривожлантиришга йўналтирилиши белгиланмоқда.

Шаҳар ва қишлоқларни бош режалар билан қамраб олишни тезлаштириш мақсадида Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимларига Қурилиш вазирлиги ва Молия вазирлиги билан бирга ҳудудларнинг ижтимоий-иқтисодий ривожланишидан келиб чиққан ҳолда аҳоли пунктларининг бош режаларини ишлаб чиқиш юзасидан Вазирлар Маҳкамасига таклиф киритиш вазифаси юклатилмоқда.

Кўпроқ янгиликлар