Агар Ғарб Россиянинг хавфсизлик кафолатлари бўйича таклифларини рад этса, Москва вазиятни баҳолайди, барча омилларни ҳисобга олган ҳолда қарор қабул қилади, деди Россия ташқи ишлар вазири Сергей Лавров.

"Агар таклифларимиз рад этилса, биз албатта, вазиятни баҳолаймиз, президентга етказамиз... Барча омилларни, биринчи навбатда хавфсизлигимизни ишончли таъминлашни ҳисобга олган ҳолда қарор қабул қиламиз", - деди Лавров.

Унинг сўзларига кўра, Россиянинг жавоблари турлича бўлиши мумкин.

"Мен президент Путин айтган гапдан ортиғини айтолмайман... Жавоб турлича бўлиши мумкин, бу ҳарбий экспертларимиз Россия президентига берадиган таклифларга боғлиқ", - деди Россия ташқи ишлар вазири.

Лавров шунингдек, ғарблик ҳамкасблари, аввало америкаликлар воқеалар ривожини кутмасдан қўлларига дарҳол "санкциявий тўқмоқ"ни олишларини қўшимча қилди.

Москва Вашингтон ва унинг иттифоқчиларидан НАТОни кенгайтирмаслик, собиқ совет мамлакатлари билан ҳарбий ҳамкорликни тўхтатиш, Европадан АҚШ ядро қуролини олиб чиқиб кетиш, НАТО кучларини 1997 йилдаги жойлашувига қайтаришни талаб қилмоқда.